დღეს, 16 სექტემბერს, საქართველოში სასწავლო პროცესი დაიწყო. სწავლა დაიწყო საჯარო სკოლებში, საბავშვო ბაღებსა და ბევრ უმაღლეს სასწავლო დაწესებულებაში.
საქართველოში 2019-2020 სასწავლო წელს პირველ კლასში 54,6 ათასზე მეტი ბავშვი შევა. რაც შეეხება სკოლებში მოსწავლეთა საერთო რაოდენობას, ეს ციფრი 591,8 ათასს აჭარბებს.
საჯარო სკოლებში სასწავლო პროცესი მომავალი წლის 12 ივნისამდე გაგრძელდება, გამოსაშვები კლასის მოსწავლეებისა და პირველკლასელების გარდა, რომლებიც შესაბამისად 20 და 27 მაისამდე ისწავლიან.
ახალი სასწავლო წლიდან ყველა პირველკლასელი ახალ კომპიუტერებს მიიღებს გაუმჯობესებული ტექნიკური შესაძლებლობებით. წლის ბოლომდე დაახლოებით 400 სკოლა აღიჭურვება უკაბელო ინტერნეტით და კომპიუტერებით და ეს პროცესი მომავალშიც გაგრძელდება.
