სომხეთის ხელისუფლების უმაღლესი პირები, მიუხედავად პოლონეთის პრეზიდენტის მიწვევისა, 1-ელ სექტემბერს მეორე მსოფლიო ომის დაწყების 80 წლისთავთან დაკავშირებით პოლონეთში დაგეგმილ ღონისძიებაში მონაწილეობას არ მიიღებენ. ამის შესახებ სომხეთის საგარეო საქმეთა მინისტრმა ზოჰრაბ მნაცაკანიანმა განაცხადა.
"ეს პრინციპული საკითხია. ჩვენ წარმოვადგენთ ქვეყანას, რომელიც უშუალოდ იყო დაკავშირებული მეორე მსოფლიო ომთან. ჩვენი წინაპრები იბრძოდნენ საბჭოთა არმიის რიგებში ნაცისტების წინააღმდეგ. ჩვენ უზარმაზარი ღვაწლი გვაქვს საერთო გამარჯვებაში და შემდეგ, სხვებთან ერთად დავიცავით ჩვენი დიდი საერთო სამშობლო [სსრკ].
და რაღა თქმა უნდა, ნორმალურია, რომ ჩვენ გვაქვს ამ საკითხისადმი მგრძნობიარე მიდგომა იმ თვალსაზრისით თუ როგორ ასეთი ღონისძიებების ორგანიზება სხვადასხვა ადგილებში", - თქვა მნაცაკანიანმა.
მანამდე პოლონეთში დაგეგმილ ღონისძიებაზე დასწრებაზე უარი განაცხადა ბელარუსის პრეზიდენტმა ალექსანდრ ლუკაშენკომ.
ვარშავაში გამართულ ცერემონიალს დაესწრებიან საქართველოს, უკრაინის, უკრაინის, ესტონეთის და სხვა რამდენიმე ქვეყნის პრეზიდენტები, ასევე, აშშ-ის ვიცე-პრეზიდენტი.
უფრო ადრე ცნობილი გახდა, რომ პოლონეთმა მეორე მსოფლიო ომის დაწყების 80 წლისთავის აღსანიშნავ ღონისძიებაზე რუსეთი არ მიიწვია.
პოლონეთში ყოველწლიურდ იმართება ღონისძიებები ნაცისტური გერმანიის თავდასხმისა და მეორე მსოფლიო ომის დაწყების დღეს - 1 სექტემბერს. ღონისძიება გდანსკში იმართება და 04:48 საათზე იწყება, სწორედ იმ დროს, როდესაც პოლონეთის ტერიტორია პირველად დაიბომბა.
აღსანიშნავია, რომ წლევანდელ ღონისძიებას ერთობლივად უმასპინძლებენ პოლონეთის პრეზიდენტი ანდჟეი დუდა და გერმანიის ფედერაციული რესპუბლიკის პრეზიდენტი ფრანკ-ვალტერ შტაინმაიერი.
წელს ვარშავაში მეორე მსოფლიო ომის 80 წლისთავის აღნიშვნა მოკავშირეების წრეში გადაწყვიტეს.
"ამ დრამატულ მოვლენებს პოლონეთი იმ ქვეყნებთან ერთად აღნიშნავს, რომელთანაც მჭიდროდ თანამშრომლობს მსოფლიოშო მშვიდობის ინტერესებიდან გამომდინარე, რაც საერთაშორისო სამართლის დაცვის პრინციპებზეა დაფუძნებული", - ნათქვამია პოლონეთის პრეზიდენტის პრესსამსახურის განცხადებაში.
