1000-გვერდიანი დოკუმენტი პარაფირებულია. ტექნიკური ხელმოწერის შემდეგ ვილნიუსში დღეს საბოლოოდ დოკუმენტის ტექსტის შეთანხმებას საქართველოს საგარეო საქმეთა მინისტრმა და კავშირის უმაღლესმა წარმომადგენელმა მოაწერეს ხელი.
ხოლო ღრმა და ყოვლისმომცველი თავისუფალი სავაჭრო სივრცის შექმნის ნაწილში - ეკონომიკის მინისტრმა გიორგი კვირიკაშვილმა და ევროკომისარმა ვაჭრობის საკითხებში კარლ დე გუხტმა.
პარალელურად, მაია ფანჯიკიძემ და ქეთრინ ეშტონმა ხელი მოაწერეს ჩარჩო ხელშეკრულებას ევროკავშირის კრიზისის მართვის ოპერაციებში საქართველოს ჩართვის შესახებ. შეთანხმების ტექსტი მომვალ კვირაში გახდება ცნობილი. ვილნიუსში ხელმოწერის ცერემონიალი ქართულ მოტივებზე შექმნილი მუსიკის ფონზე წარიმართა. ცოტა ხნის წინ კი სამიტის დასკვნითი ნაწილი დაიწყო.
ვილნიუსში ასოცირების დოკუმენტის პარაფირებას ქართველი დეპუტატები ქუთაისში პარლამენტის სხდომათა დარბაზში პირდაპირ ეთერში ადვნებდნენ თვალს. თუმცა ტრანსლაციას მხოლოდ უმრავლესობის ნაწილი დაესწრო.
ოპოზიციის განცხადებით, მათ ჩვენების შესახებ ინფორმაცია არ ჰქონდათ. რაც შეეხება დოკუმენტის პარაფირებას, უმრავლესობაც და უმცირესობაც თანხმდება, რომ ქვეყნის ისტორიაში ახალი ეტაპი დაიწყო. ასოცირების ხელშეკრულების გაფორმება კი საქართველოსთვის ეკონომიკური და პოლიტიკური სტაბილურობის გარანტი იქნება.
დეპუტატები ყურადღებას ამახვილებენ ვიზების ლიბერალიზაციის, ასევე ღრმა და ყოვლისმომცველი ვაჭრობის მნიშვნელობაზე. უმცირესობა არ გამორიცხავს რუსეთისგან მომავალში მოსალოდნელ საფრთხეებსაც.
ასოცირების დოკუმენტის პარაფირებაზე შეფასებები კეთდებოდა მთელი დღის განმავლობაში. პოლიტიკოსები, დიპლომატები თუ ექსპერტები თანხმდებიან, რომ ქვეყნის ისტორიაში ახალი ეტაპი დაიწყო, თავად ასოცირების ხელშეკრულების გაფორმებამდე კი მოსალოდნელია რუსეთმა საქართველოზე ზეწოლა გააძლიეროს.
