მოძრაობა "სამართლიანობა უნდა აღსდგეს" მართლმსაჯულების ხარვეზების დამდგენი კომისიის შექმნაზე ხელისუფლების უარს აპროტესტებს. ამის შესახებ ნათქვამია მოძრაობა ,,სამართლიანობა უნდა აღსდგეს" სახელით ნანა კაკაბაძის მიერ გავრცელებულ განცხადებაში.
როგორც განცხადებაშია აღნიშნული, საქართველოს იუსტიციის მინისტრ თეა წულუკიანის განცხადებით, ხელისუფლებამ უარი თქვა მართლმსაჯულების ხარვეზების დამდგენი იმ კომისიის შექმნაზე, რომლის ჩამოყალიბებასაც ერთ წელზე მეტი ხნის განმავლობაში "ამაოდ ელოდა საქართველოს მოსახლეობის უმრავლესობა".
"მისი განცხადებით, ამის მიზეზად მთავრობამ დაასახელა იმის საშიშროება, რომ საქმეების გადასინჯვისა და მათ ნაწილზე გამამართლებელი განაჩენების დადგენის შემთხვევაში გამართლებული პირები მოითხოვენ ფინანსურ კომპენსაციას, რისი გადახდის საშუალებაც ბიუჯეტს არ გააჩნია.
მიგვაჩნია, რომ ხელისუფლების მხრიდან ასეთი გადაწყვეტილების მიღება იმ "უდანაშაულო დამნაშავეებისათვის" და მათი ოჯახის წევრებისათვის მიცემული დაპირების შეუსრულებლობაა, რომელთა მხარდაჭერამაც ბევრწილად განაპირობა "ქართული ოცნების" ხელისუფლებაში მოსვლა. ეს არის ქართული საზოგადოების იმ ნაწილის შეურაცხყოფა, რომლებმაც სწორედ სამართლიანობის აღდგენის იმედით მოიყვანა ხელისუფლებაში მმართველი კოალიცია. ასეთი ცინიკური გადაწყვეტილებით ხელისუფლებამ შეურაცხყო ქართული საზოგადოება, რომლისთვისაც მთავრი ღირებულება ღირსების აღდგენა და არა ფულადი კომპენსაციების მიღებაა. შესაბამისი პოლიტიკური ნების არსებობის შემთხვევაში ხელისუფლებას თავისუფლად შეეძლო ერთმანეთისაგან გაემიჯნა სისხლის სამართლებრივი და სამოქალაქო წესით კომპენსაციის მიღების საკითხები და ამ უკანასკნელის აღსრულება გადაევადებინა რამდენიმე (თუნდაც 10) წლით. თუმცა, ხელისუფლებამ უფრო მარტივი გზა აირჩია და ამ გადაწყვეტილებით უსამართლო სასამართლოების მიერ მსჯავრდებულ მოქალაქეებს უბრალოდ, მოუწოდა, რომ "გაგებით მოეკიდონ" შექმნილ მდგომარეობას და კვლავაც უდრტვინველად ატარონ დამნაშავეების სახელი",- ნათქვამია განცხადებაში.
ნანა კაკაბაძე მოუწოდებს ყველა მოქალაქეს, ვისაც მიაჩნია, რომ "ქართულმა ოცნებამ" არ შეასრულა სამართლიანობის აღდგენის და უკანონო განაჩენების გადახედვის შესახებ საზოგადოებისათვის მიცემული დაპირება, გააპროტესტოს ხელისუფლების ასეთი მოქმედება და მოსთხოვოს მას დანაპირების შესრულება.
"ვადამდელი საპარლამენტო არჩევნების და სამართლიანობის აღდგენის მოთხოვნით საპროტესტო აქცია 15 დეკემბერს, 13.00 საათზე, თბილისში, ყოფილი პარლამენტის შენობის წინ გაიმართება", - ნათქვამია განცხადებაში.