საქართველო ერთადერთი ქვეყანაა მსოფლიოში, რომელმაც ერთ წელიწადში 23 პოზიციით გაიუმჯობესა რეიტინგი „The Networked Readiness Index"-ში და შარშანდელი 88 პოზიციიდან 65-ე ადგილზე გადმოიცვლა. სულ რეიტინგში 144 ქვეყნის მონაცემებია შესული.
The Networked Readiness Index (ქსელური მზაობის ინდექსი) არის კომპლექსური მაჩვენებელი, რომელიც მსოფლიოს ქვეყნებში საინფორმაციო-საკომუნიკაციო ტექნოლოგიების განვითარების ხარისხს ასახავს. აღნიშნული რეიტინგი 2002 წლიდან მსოფლიო ეკონომიკური ფორუმის ფარგლებში ყოველწლიურად ქვეყნდება.
ქსელური მზაობის ინდექსი სამ მთავარ ჯგუფში გაერთიანებული 53 პარამეტრის თანახმად გამოითვლება:
1. საინფორმაციო-საკომუნიკაციო ტექნოლოგიების (ICT) განვითარებისთვის სათანადო პირობების არსებობა - ICT - ის თვალსაზრისით საქმიანი და ნორმატიულ-სამართლებრივი გარემოს საერთო მდგომარეობა, ჯანსაღი კონკურენციის არსებობა, ინოვაციური პოტენციალი, აუცილებელი ინფრატრუქტურა, ახალი პროექტების ფინანსირების შესაძლებლობა, რეგულირების ასპექტები და სხვ.
2. მოქალაქეების, საქმიანი წრეებისა და სახელმწიფო ორგანოების მზაობა ICT-ის გამოყენების მიმართულებით - სახელმწიფოებრივი პოზიცია საინფორმაციო ტექნოლოგიების განვითარების შესახებ, ამ სფეროში სახელმწიფო ხარჯები, ბიზნესისთვის საინფორმაციო ტექნოლოგიების ხელმისაწვდომობა, ინტერნეტის ქსელის ხელმისაწვდომობა და შეღწევადობის ხარისხი, მობილური კავშირის ღირებულება და სხვ.
3. ICT-ის გამოყენების ხარისხი საზოგადოებრივ, კომერციულ და სახელმწიფო სექტორებში - პერსონალური კომპიუტერების, ინტერნეტ და მობილური კავშირგამბულობის აბონენტების რაოდენობა, სახელმწიფო ორგანიზაციებში მოქმედი ინტერნეტ-რესურსების არსებობა, აგრეთვე ქვეყანაში საინფორმაციო ტექნოლოგიების მოხმარება და წარმოება.