14 ნოემბერს, 18:00 საათზე, საქართველოს პარლამენტის ეროვნული ბიბლიოთეკის საგამოფენო დარბაზში სირიელი მხატვრის აბდალა ომარის გამოფენა „ომის ხიბლი" გაიხსნება. გამოფენაზე, ნახატებთან ერთად, ინსტალაციები იქნება წარმოდგენილი.
"კონფლიქტების დროს ბავშვები ხშრად სიბნელეში, მედიისა და მსოფლიოს ყურადღების ცენტრს მიღმა რჩებიან. მათი სუსტი ხმა ვერ წვდება ჩვენს სმენას, უცხოა აღსაქმელად. პატარებს არ აინტერესებთ უფროსების თამაში სახელად „ომები", მათ თავიანთი მხიარული, ბავშვური თამაშები სურთ" - ამბობს მხატვარი ომარ აბდალა.
სირიელი მხატვარი და რეჟისორი ომარ აბდალა 1986 წელს დამასკოში დაიბადა. 2009 წელს ომარმა ერთდროულად დაამთავრა ადჰამ ისმაილის სახვითი და გამოყენებითი ხელოვნების ინსტიტუტი და დამასკოს უნივერსიტეტი, სადაც მიიღო სამეცნიერო ხარისხი ინგლისურ ლიტერატურაში.
სწავლის დროს ომარი თავადაც ქმნიდა ფილმებს, ასევე, მონაწილეობდა ანიმაციურ ფილმებში, სერიალებსა და ვიდეოარტებში. მათ შორისაა სირიელი რეჟისორის მვაფაქ კატის ფილმი „მეთერთმეტე მცნება". 2010 წელს ომარ აბდალას ნამუშევრები წარდგენილი იყო დამასკოს კინოს საერთაშორისო ფესტივალზე.
სწავლის დამთავრების შემდეგ ომარ აბდალა მონაწილეობდა არაერთ გამოფენაში, აუქციონსა და ფესტივალში სირიაში, ლიბანში, არაბთა გაერთიანებულ საემიროებში, საფრანგეთში, გაერთიანებულ სამეფოში, დანიაში, გერმანიაში, პოლონეთში და სხვ.
„ემოციით სავსე", ასე ეწოდება მხატვრის მიერ ზეთში შესრულებულ კომპოზიციებს, სადაც ასახულია რთული ფსიქოლოგიური მდგომარეობა და ამავდროულად, მხატვრული ხერხებისა და რეალისტური გამოსახულების საშუალებით შენარჩუნებულია სიღრმისეული სილამაზე.
გამოფენა 19 ნოემბრამდე გაგრძელდება.