გრიპის ვაქცინაციას გარკვეული რისკ-ჯგუფებისთვის სახელმწიფო დააფინანსებს. როგორც გაზეთ ,,პრემიერთან" ინტერვიუში დაავადებათა კონტროლისა და საზოგადოებრივი ჯანდაცვის ეროვნული ცენტრის ხელმძღვანელი ამირან გამყრელიძე აცხადებს ვაქცინაციის პროცესი არაუგვიანეს დეკემბერში დაიწყება.
,,მთავრობამ უკვე მიიღო დადგენილება, რომლითაც შესაბამისი პროგრამები უკვე დამტკიცდა. ვფიქრობთ, ვაქცინის შესყიდვა 2-3 კვირის ვადაში მოხერხდება. ამ დრომდე სახელმწიფოს გრიპის ვაქცინა არასდროს უყიდია და ქვეყანაში ორგანიზებული გრიპის ვაქცინაცია არ ჩატარებულა. თუ არ ჩავთვლით პანდემიის შემდეგ, როცა 2008 ან 2009 წელს მსოფლიო ჯანდაცვის ორგანიზაციამ საქართველოს აჩუქა ვაქცინა და მაშინ განხორციელდა ვაქცინაცია. ამავე დროს 2004-2005 წწ. მსოფლიო ბანკის დახმარებით მოხდა 2-3 ათასი ვაქცინის შეძენა. ხოლო სახელმწიფოს მხრიდან ვაქცინის შესყიდვა პირველად ხორციელდება. ჩვენი რეკომენდაციაა, რომ განსაკუთრებული რისკ-ჯგუფების ადამიანებისთვის აუცილებელია გრიპის ყოველწლიური ვაქცინაცია. ხაზი უნდა გავუსვათ იმას, რომ გრიპის ვაქცინაციას ასპროცენტიანი გარანტია არ აქვს და არ ტოვებს ხანგრძლივ იმუნიტეტს. ამიტომ, თუ ადამიანი წელს აიცრება, სასურველია გრიპის ვაქცინა მომავალ წელსაც გაიკეთოს", _აცხადებს, ,პრემიერთან" ინტერვიუში გამყრელიძე.
მისივე განმარტებით, სახელმწიფო ვაქცინის შეძენა, დაახლოებით, ასი ათას ლარამდე დაუჯდება.
,,სახელმწიფო მხოლოდ ვაქცინისთვის იხდის ფულს, რადგან აცრა საყოველთაო ჯანდაცვის პროგრამაში შედის. წინასწარი გათვლებით სახელმწიფოს ასი ათას ლარამდე დაუჯდება ვაქცინის შეძენა", _აცხადებს გამყრელიძე.