იმისათვის, რომ კომპანია „გუდვილი" რეაბილიტაციის რეჟიმზე გადავიდეს, მას აღსრულების ეროვნული ბიუროსთვის მომსახურების საფასურად 2 მლნ ლარზე მეტის გადახდა უწევს, რაც ამ ეტაპზე კომპანიისათვის წარმოუდგენლად დიდი თანხაა.
როგორც კომპანია „გუდვილის" იურიდიული სამსახურის უფროსი დავით გლუნჩაძე განმარტავს, ამ ეტაპზე კომპანიას ზედმეტად 2 მლნ ლარზე მეტი თანხის გადახდის საშუალება არ აქვს, არადა არსებული კანონმდებლობით „გუდვილი" იძულებულია ჯერ აღსრულების ეროვნული ბიურო დააკმაყოფილოს, ხოლო შემდგომ ახალი ვალდებულებები, უზრუნველყოფილი კრედიტორები და შემდეგ ჩვეულებრივი კრედიტორები. ანუ თუ კომპანია „გუდვილი" აღსრულების ეროვნულ ბიუროს მომსახურების საფასურს არ გადაუხდის, მანამდე ის სხვა კრედიტორებისთვის 1 თეთრის გადახდასაც ვერ შეძლებს.
„როგორც ცნობილია, სასამართლოში გადახდისუუნაროდ ცნობის განცხადება შევიტანეთ, რათა კომპანია რეაბილიტაციის რეჟიმში გადავიყვანოთ. კანონმდებლობის მიხედვით, ასეთ დროს კომპანიას მეურვე ენიშნება და ეს მეურვე კი აღსრულების ეროვნული ბიურო გახლავთ. აღსრულების ეროვნული ბიუროს მომსახურების საფასური კი შეადგენს კომპანიის აქტივების 7 %-ს, და იმავდროულად კანონმდებლობით საფასურის მაქსიმალური ზღვარი არ არის დაწესებული. კომპანია „გუდვილის" შემთხვევაში, აღსრულების ეროვნული ბიუროსთვის მომსახურების საფასურისთვის გადასახდელი თანხა 2 მლნ ლარზე მეტი გამოდის, რადგანაც კომპანიის აქტივები 30 მლნ ლარზე მეტია. ეს თანხა კომპანიებისთვის პირველი რიგის დასაფარი დავალიანებაა, ანუ ეს თანხა კრედიტორების დავალიანებაზე ადრე უნდა დაიფაროს. გამოდის, რომ კომპანია „გუდვილი" რეაბილიტაციის რეჟიმზე გადავა თუ არა, ეს ჯერ კიდევ საკითხავია. ეს ყველაფერი კი შესაძლოა კომპანიის სრული გაკოტრების გამომწვევიც კი გახდეს. ამ ეტაპზე, რომ 2 მლნ ლარი აღსრულების ეროვნულ ბიუროს გადავუხადოთ საკმაოდ წარმოუდგენელია.
2012 წლამდე კანონმდებლობის მიხედვით, მეურვის ანაზღაურება 5000 ლარი იყო და დამერწმუნეთ, რომ 5 ათას ლარსა და 2 მლნ ლარს შორის საკმაოდ დიდი სხვაობაა. დღევანდელი კანონმდებლობით კი მეურვისთვის გადასახდელი თანხა მინიმალური მოცულობით 5 ათასი ლარია, ხოლო ზედა ზღვარი კი აქტივების 7 %-ი, თუმცა არ მომხდარა მაქსიმალური ზღვარის განსაზღვრა, ეს 7 %-ი რამდენი შეიძლება ყოფილიყო თანხობრივად.
ჩვენ დახმარებისთვის მივმართეთ იუსტიციის სამინისტროს, რათა უწყებას კორექტირება შეეტანა საკუთარ გადაწყვეტილებაში და მაქსიმალური ზღვარი განესაზღვრათ.
თუ იუსტიციის სამინისტრო პრეცედენტს არ დაუშვებს და საკუთარ ბრძანებულებას არ შეცვლის, მაშინ შესაძლოა კომპანია „გუდვილი" სრულად გაკოტრდეს და ასევე მასთან მიბმული 1000მდე კრედიტორი. ასეთ ვითარებაში კი გამოდის, რომ ქართული ბიზნესი უნდა მოკვდეს"- განმარტავს „გუდვილის" იურიდიული სამსახურის უფროსი.
დავით გლუნჩაძის განმარტებით, 13 ნოემბერს საქალაქო სასამართლოს სხდომაა ჩანიშნული, სადაც კომპანია „გუდვილის" კრედიტორთა მოთხოვნები იქნება განხილული. უფრო კონკრეტულად თუ კომპანიას რა დავალიანებები გააჩნია.
„დადგინდება ზუსტი დავალიანების ოდენობა და შემდგომ აირჩევა მომრიგებელი საბჭო, რომელიც ღებულობს გადაწყვეტილებას, რომ რეაბილიტაციის გზით წავიდეს კომპანია და ამის შემდეგ უნდა შემუშავდეს რეაბილიტაციის გეგმა. რეაბილიტაციის რეჟიმზე გადასვლის წინაპირობა კი არის აღსრულების ეროვნული ბიუროსათვის გადასახდელი თანხა"- განმარტავს „გუდვილის" წარმომადგენელი.