„წელს საქართველოს ჩაუთვალეს ერთადერთი რეფორმა - "პერსონალურ მონაცემთა დაცვის შესახებ" 2011 წლის დეკემბერში მიღებული კანონის იმპლემენტაცია და საქართველო მე-8 ადგილზე გადავიდა.
საქართველოს 2011 წელს მიღებული კანონი მაშინვე რეფორმად არ ჩაეთვალა, რადგან Doing Business-ის რეიტინგი ყურადღებას აქცევს პრაქტიკას (კანონმდებლობის აღსრულებას). 1-წლიანი დაკვირვების შემდეგ, Doing Business-მა ჩაგვითვალა რეფორმად კანონის იმპლიმენტაცია (აღსრულება) და არა კანონის მიღება (Doing Business 2014 Report: "Georgia improved its credit information system by implementing a new law on personal data protection")"- აცხადებს ნათია სამუშია.

თბილისის პოლიტიკის ანალიზის ცენტრი წარმომადგენლის განმარტებით, „Doing Business 2014"-ის ანგარიში მოიცავს პერიოდს 2013 წლის 1-ელ ივნისამდე.

ნათია სამუშია აცხადებს, რომ Doing Business-ის საუკეთესო ათეული არის განვითარებული და სწრაფად განვითარებადი ქვეყნების ჯგუფი. საქართველო ამ ჯგუფის წევრია და ეს ნიშნავს რომ საქართველო სწრაფი განვითარების გზას ადგა იმ რეფორმებით, რომლებსაც ბიზნესის წარმოების გამარტივებისათვის ის ახორციელებდა 2004 წლიდან.

მსოფლიო ბანკის ინფორმაციით, `Doing Business~-ის 2014 წლის ანგარიშში, საქართველო 189 ქვეყანას შორის მსოფლიოში ბიზნესის წარმოების სიმარტივის თვალსაზრისით მე-8 ადგილზე დასახელდა და პოზიცია, გასულ წელთან შედარებით, 1 საფეხურით გაიუმჯობესა.

`Doing Business 2014~-ის თანახმად, საქართველო ბიზნეს გარემოს გაუმჯობესების თვალსაზრისით მოწინავეა ევროპისა და ცენტრალური აზიის ქვეყნებს შორის.

ანგარიშის მიხედვით, საქართველო ოთხი მაჩვენებლით - ბიზნესის დაწყება, მშენებლობის ნებართვის მიღება, ქონების რეგისტრაცია და კრედიტის მიღება - მსოფლიო მასშტაბით, ქვეყნების პირველ ათეულში შედის.

ქონების რეგისტრაციის სიმარტივით, გასული წლის მსგავსად, საქართველო მსოფლიოში პირველ ადგილზეა.

გასულ წელთან შედარებით, საქართველოში მნიშვნელოვნად გაუმჯობესდა საკრედიტო ინფორმაციული სისტემა პერსონალური მონაცემების დაცვის კუთხით.

ამავე კვლევის თანახმად, საქართველოს შემთხვევაში „საზღვრამდე მანძილი" 2013 წელს (პროცენტული მაჩვენებელი) 81.1 იყო (2012 წელს ეს მაჩვენებელი 80.8 პროცენტს შეადგენდა, ერთ წელიწადში კი 0.2 პროცენტიან გაუმჯობესებას ჰქონდა ადგილი).

„2004 წელს ევროკავშირში გაწევრიანება რეგიონის ზოგიერთი ქვეყნისთვის დიდი სტიმული იყო. ჩვენი კვლევის მიხედვით აღნიშნულმა ქვეყნებმა ევროკავშირში გაწევრიანების შემდეგაც გააგრძელეს ყოვლისმომცველი და ამბიციური ეკონომიკური და ინსტიტუციონალური რეფორმების განხორციელება, რამაც მათ საშუალება მისცა კონკურენცია გაეწიათ მაღალშემოსავლიანი ქვეყნებისთვის. გარდა ამისა, ანგარიშში ნაჩვენებია, რომ ევროპისა და ცენტრალური აზიის რეგიონში დამაიმედებელი პროცესები მთელი მასშტაბით მიმდინარეობს. 2009 წლის შემდეგ ბიზნესის რეგულირების სწრაფად გაუმჯობესებით გამორჩეული 20 ქვეყნიდან 9 ამ რეგიონში მდებარეობს. ესენია: სომხეთი, ბელარუსი, საქართველო, კოსოვო, ყოფილი იუგოსლავიის რესპუბლიკა მაკედონია, მოლდოვა, პოლონეთი, რუსეთის ფედერაცია და უკრაინა."- განაცხადა მსოფლიო ბანკის ჯგუფის გლობალური ინდიკატორების და ანალიზის დეპარტამენტის დირექტორმა აუგუსტო ლოპეს-კლაროსმა.