საქართველომ, რომელიც „ბიზნესის წარმოება 2014" კვლევის თანახმად, ბიზნესის წარმოების სიმარტივის მიხედვით მე-8 ადგილზეა, საკრედიტო ინფორმაციის სისტემის გაუმჯობესება პირადი ინფორმაციის დაცვის შესახებ ახალი კანონის მიღებით მოახდინა. ამავე კვლევის თანახმად, საქართველოს შემთხვევაში „საზღვრამდე მანძილი" 2013 წელს (პროცენტული მაჩვენებელი) 81.1 იყო (2012 წელს ეს მაჩვენებელი 80.8 პროცენტს შეადგენდა, ერთ წელიწადში კი 0.2 პროცენტიან გაუმჯობესებას ჰქონდა ადგილი).
„2004 წელს ევროკავშირში გაწევრიანება რეგიონის ზოგიერთი ქვეყნისთვის დიდი სტიმული იყო. ჩვენი კვლევის მიხედვით აღნიშნულმა ქვეყნებმა ევროკავშირში გაწევრიანების შემდეგაც გააგრძელეს ყოვლისმომცველი და ამბიციური ეკონომიკური და ინსტიტუციონალური რეფორმების განხორციელება, რამაც მათ საშუალება მისცა კონკურენცია გაეწიათ მაღალშემოსავლიანი ქვეყნებისთვის. გარდა ამისა, ანგარიშში ნაჩვენებია, რომ ევროპისა და ცენტრალური აზიის რეგიონში დამაიმედებელი პროცესები მთელი მასშტაბით მიმდინარეობს. 2009 წლის შემდეგ ბიზნესის რეგულირების სწრაფად გაუმჯობესებით გამორჩეული 20 ქვეყნიდან 9 ამ რეგიონში მდებარეობს. ესენია: სომხეთი, ბელარუსი, საქართველო, კოსოვო, ყოფილი იუგოსლავიის რესპუბლიკა მაკედონია, მოლდოვა, პოლონეთი, რუსეთის ფედერაცია და უკრაინა."- განაცხადა მსოფლიო ბანკის ჯგუფის გლობალური ინდიკატორების და ანალიზის დეპარტამენტის დირექტორმა აუგუსტო ლოპეს-კლაროსმა.
მსოფლიო ბანკის ინფორმაციით, ბოლო ერთი წლის განმავლობაში რუსეთის ფედერაცია მსოფლიოს მასშტაბით ამ მხრივ ყველაზე სწრაფად პროგრესირებადი ქვეყნების ათეულში მოხვდა. ქვეყანამ ხუთ სფეროში განახორციელა რეფორმები და ეს „ბიზნესის წარმოების" ანგარიშშიც აისახა. მოსკოვში მშენებლობის ნებართვის მიღება ამჟამად უფრო სწრაფად არის შესაძლებელი და უფრო მოწესრიგებული ფორმითაც გაიცემა, ხოლო ნებართვისთვის დაწესებული გადასახადი შემცირდა, რაც ეროვნული ურბანული დაგეგმარების კოდექსის მიღებისა და ახალი შენობების რეგისტრაციისთვის კონკრეტული ვადების დაწესების შედეგია.
პოლონეთში ბიზნესის რეგულირების გამარტივების პროცესი კვლავაც გრძელდება. წლევანდელი ანგარიშის მიხედვით, ბიზნესის წარმოების სიმარტივის რეიტინგში ეს ქვეყანა 189 სახელმწიფოდან 45-ე პოზიციას იკავებს. ბოლო ერთი წლის განმავლობაში პოლონეთის მთავრობამ ბიზნესის რეგისტრაციისა და მშენებლობის ნებართვის გაცემის პროცედურები გაამარტივა.
ხორვატიამ პროგრესს ხუთ სფეროში მიაღწია. მაგალითად საერთაშორისო ვაჭრობის გასაუმჯობესებლად ხორვატიის მთავრობამ რიეკას პორტის განვითარებაში ინვესტიციები განახორციელა და ევროკავშირის საერთო სატრანზიტო კონვენციაზე მიერთებისთვის მზადების პროცესში საბაჟოს მუშაობა გააუმჯობესა.
სინგაპური ბიზნესის წარმოების სიმარტივის მხრივ მსოფლიო რეიტინგის სათავეშია. სინგაპურის გარდა ბიზნესის ხელშეწყობის მხრივ ყველაზე კარგი რეგულირების მქონე ქვეყნების ათეულში ასევე შედის, ჰონგ-კონგის სპეციალური ადმინისტრაციული რეგიონი (ჩინეთი); ახალი ზელანდია, ამერიკის შეერთებული შტატები, დანია, მალაიზია, კორეის რესპუბლიკა, საქართველო, ნორვეგია და დიდი ბრიტანეთის გაერთიანებული სამეფო.
მსოფლიო რეიტინგების გარდა "ბიზნესის წარმოების" ანგარიში ყოველწლიურად იმ ქვეყნებს ასახელებს, რომლებმაც წინა წელთან შედარებით ყველაზე მეტად გააუმჯობესეს მაჩვენებლები. წელს ის 10 ქვეყანა, რომლებიც ამ სიას უდგანან სათავეში (გაუმჯობესების ხარისხის მიხედვით) არიან: უკრაინა, რუანდა, რუსეთის ფედერაცია, ფილიპინები, კოსოვო, ჯიბუტი, კოტ-დ'ივუარი, ბურუნდი, ყოფილი იუგოსლავიის რესპუბლიკა მაკედონია და გვატემალა. თუმცა პრობლემებიც რჩება: ამ წლის ყველაზე მეტად პროგრესირებადი ქვეყნებიდან ხუთი სახელმწიფო: ბურუნდი, კოტ-დ'ივუარი, ჯიბუტი, ფილიპინები და უკრაინა მსოფლიოში ბიზნესის წარმოების სიმარტივის რეიტინგის ქვედა ნახევარში რჩებიან.
აღსანიშნავია, რომ მსოფლიო ბანკის ჯგუფის ახალი კვლევის თანახმად, ევროპისა და ცენტრალური აზიის რეგიონში ბიზნესის რეგულირების სფეროში რეფორმების ტემპი კვლავ მაღალია. გასულ წელს ბიზნესის რეგულირების პროცედურების გაუმჯობესების მიზნით 19 ქვეყანამ 65 რეფორმა განახორციელა.
კვლევა სახელად „ბიზნესის წარმოება 2014: მცირე და საშუალო საწარმოების რეგულირება" აჩვენებს, რომ სამართლებრივი ინსტიტუტების გაძლიერებაზე და მარეგულირებელი პროცესების სირთულის და ხარჯების შემცირებაზე მიმართულმა ძალისხმევამ ევროპისა და ცენტრალური აზიის რეგიონში მეწარმეებს სარგებელი მოუტანა. ევროპისა და ცენტრალური აზიის რეგიონმა აღმოსავლეთ აზიის და წყნარი ოკეანის რეგიონს გაუსწრო და ევროპის თანამშრომლობისა და განვითარების ორგანიზაციის მაღალშემოსავლიანი ქვეყნების შემდეგ მეორე ადგილი დაიკავა, როგორც ბიზნესისთვის ყველაზე ხელსაყრელმა რეგიონმა.
კვლევის მიხედვით, 2009 წლის შემდეგ ევროპისა და ცენტრალური აზიის ქვეყნების 92 პროცენტმა ბიზნესის დაწყების პროცედურები გააუმჯობესა, რაც უფრო მაღალი მაჩვენებელია, ვიდრე ნებისმიერ სხვა რეგიონში. ამ ძალისხმევის შედეგად დღესდღეობით ბიზნესის დაწყება ამ რეგიონში ყველაზე მარტივია და ამ მაჩვენებლით რეგიონი ევროპის თანამშრომლობისა და განვითარების ორგანიზაციის მაღალშემოსავლიან ქვეყნებსაც კი უსწრებს. ფინანსური კრიზისის საპასუხოდ რეგიონის ქვეყნების 73-მა პროცენტმა იმავე პერიოდში გადახდისუუნარობის პროცედურების რეფორმირება მოახდინა. გარდა ამისა, ამ ქვეყნების 85 პროცენტში გადასახადების გადახდის პროცედურები გამარტივდა.
