ხურჩის ტერაქტში ბრალდებული ყოფილი მაღალჩინოსნების რომან შამათავასა და მალხაზ მურღულიას ადვოკატები საქალაქო სასამართლოს გადაწყვეტილებას სააპელაციო სასამართლოში გაასაჩივრებენ.
კუდ-ის აფხაზეთის მთავარი სამმართველოს ყოფილი ხელმძღვანელი და სამეგრელო-ზემო სვანეთის სპეციალურ ღონისძიებათა ცენტრის ყოფილი თანამშრომელი ბრალს არ აღიარებენ.
ადვოკატის განცხადებით, ბრალდებულები შიმშილობას განაგრძობენ, რის გამოც მათი ჯანმრთელობის მდგომარეობა გაუარესდა. ბრალდების დამტკიცების შემთხვევაში, შამათავასა და მურღულიას 15-დან 20 წლამდე პატიმრობა ემუქრებათ.
გამოძიების ინფორმაციით, სწორედ ყოფილმა მაღალჩინოსნებმა დაგეგმეს 5 წლის წინ საპარლამენტო არჩევნების დღეს ზუგდიდის რაიონის სოფელ ხურჩაში მომხდარი ტერაქტი, რომელშიც წინა ხელისუფლება საოკუპაციო რეჟიმს ადანაშაულებდა.
შეგახსენებთ, რომ გუშინ გამართულ სასამართლო პროცესზე მოსამართლემ რომან შამათავასა და მალხაზ მურღულიას აღმკვეთის ღონისძიების სახით წინასწარი პატიმრობა შეუფარდა.
