11:00 საათზე, თბილისის საქალაქო სასამართლოში ხურჩაში მომხდარ ტერაქტში ბრალდებულებს, რომან შამათავასა და მალხაზ მუღულიას აღმკვეთ ღონისძიებას შეუფარდებენ.
შამათავა და მურღულია ბრალს არ აღიარებენ და მათ პროტესტის ნიშნად უვადო შიმშილობა დაიწყეს.
დაკავებულების ადვოკატების განცხადებით, ბრალდების მხარეს მსგავსი ხარისხის მძიმე ბრალდების წაყენებისთვის მყარი მტკიცებულებები არ აქვს, თუმცა მათი დაცვის ქვეშ მყოფებს თუ მაინც წაუყენებენ ბრალს, დაცვის მხარე გირაოთი გათავისუფლების შუამდგომლობას დააყენებს.
"ორივე პირი აბსურდულს და სამარცხვინოს უწოდებს ბრალდებებს, სწორედ აქედან გამომდინარე დაიწყეს მათ უვადო შიმშილობა და აცხადებენ, რომ ეს საქმე პირდაპირ არის ქსეროქსი იმ სისხლის სამართლის საქმის, რომელიც 2008 წელს დაიწყეს აფხაზებმა აფხაზეთის ტერიტორიაზე. კიდევ ერთხელ დავაყენეთ იმ შუამდგომლობას, რომ საერთოდ აღკვეთის ღონისძიება არ შეეფარდოთ,"- განაცხადა გოგა ონანმა.
2008 წლის 21 მაისს ზუგდიდის რაიონის სოფელ ხურჩაში მომხდარი ტერაქტის გამოძიების ფარგლებში ყოფილი მაღალჩინოსნების ბრალეულობა გამოიკვეთა.
საქართველოს შინაგან საქმეთა სამინისტროს სახელმწიფო უსაფრთხოების სააგენტოს თანამშრომლებმა ტერორისტული აქტის მოწყობის ბრალდებით შსს კონსტიტუციური უსაფრთხოების დეპარტამენტის აფხაზეთის ავტონომიური რესპუბლიკის მთავარი სამმართველოს ყოფილი უფროსი რომან შამათავა დააკავეს. შამათავასთან ერთად დაკავებულია სამეგრელო-ზემო სვანეთის სპეციალურ ღონისძიებათა ცენტრის განსაკუთრებულ დავალებათა დეპარტამენტის სამმართველოს ყოფილი თანამშრომელი მალხაზ მურღულია.
შსს ინფორმაციით, 2008 წლის 21 მაისს, ზუგდიდის რაიონის სოფელ ხურჩაში, მშვიდობიანი მოსახლეობის დაშინების მიზნით, რომან შამათავამ, შსს-ს სხვა მაღალ თანამდებობის პირებთან ერთად, ორგანიზება გაუკეთა და განახორციელა ტერორისტული აქტი, რამაც შექმნა ადამიანის სიცოცხლის მოსპობის და მნიშვნელოვანი ქონებრივი ზიანის განხორციელების საშიშროება, ასევე, ხელყო საზოგადოებრივი უსაფრთხოება.
"კერძოდ, 2008 წლის 21 მაისს, საქართველოს საპარლამენტო არჩევნებში მონაწილეობის სოფელ ხურჩაში მობილიზებული იქნა გალის რაიონის სოფელ ნაბაკევის მოსახლეობა, რომელიც საზოგადოებრივი ტრანსპორტის მეშვეობით აპირებდა ზუგდიდში გამგზავრებას. დასახელებულ დროს, სოფელ ხურჩაში ტერორისტული აქტის განსახორციელებლად ჩასაფრებულმა რომან შამათავამ, მალხაზ მურღულიამ და მათმა თანამზრახველებმა, ავტომატური ცეცხლსასროლი იარაღიდან ურთიერთშორის ნაწარმოები მრავალჯერადი გასროლით მშვიდობიან მოსახლეობაში გამოიწვიეს პანიკა, აგრეთვე, მალხაზ მურღულიამ ,,ერ პე გე"-ს ტიპის ყუმბართმტყორცნიდან განხორციელებული ორი გასროლით ააფეთქა ხალხის გადასაყვანად მობილიზებული ავტობუსები. აფეთქების შედეგად სრულად განადგურდა ორივე სატრანსპორტო საშუალება, ხოლო სიცოცხლისათვის სახიფათო ჯანმრთელობის მძიმე ხარისხის დაზიანება მიიღო მოქალაქე ნანი ქარდავამ. ტერორისტული აქტის განხორციელების შემდეგ, ორგანიზატორებმა სატრანსპორტო საშუალების მძღოლებსა და დაჭრილ მოქალაქეს შინაგან საქმეთა სამინისტროს ფარული ასიგნებებიდან აუნაზღაურეს მიყენებული ზიანი,"- ნათქვამია შინაგან საქმეთა სამინისტროს მიერ გავრცელებულ განცხადებაში.
გამოძიება საქართველოს სსკ-ის 323-ე მუხლის მე-2 და მე-3 ნაწილებით გათვალისწინებული დანაშაულის ნიშნებით მიმდინარეობს, რაც სასჯელის სახით 15-დან 20 წლამდე ან უვადო თავისუფლების აღკვეთას ითვალისწინებს.
