გულის ქირურგიის ქვეპროგრამის პროექტი ითვალისწინებს გულის თანდაყოლილი და შეძენილი მანკების კარდიოქირურგიულ მკურნალობას, ენდოვასკულურ ოპერაციებს, გულისა და მაგისტრალური სისხლძარღვების შეძენილი პათოლოგიების ქირურგიულ მომსახურებას და კორონარულ ანგიოპლასტიკას.
პროგრამით სარგებლობა შეეძლებათ საქართველოს მოქალაქეებს 18 წლის ასაკიდან, რომლებიც 2014 წლის 1 იანვრის მდგომარეობით და ვაუჩერის გაცემის პერიოდისათვის უწყვეტად რეგისტრირებულნი არიან აჭარის ავტონომიურ რესპუბლიკის ტერიტორიაზე.
დაფინანსება განხორციელდება შემდეგი ფორმით:
1) 100 000-ის ჩათვლით სარეიტინგო ქულის მქონე მოქალაქეები დაფინანსდებიან-90% (თანაგადახდა 10%).
2) 100 001-დან 200 000-ის ჩათვლით სარეიტინგო ქულის მქონე მოქალაქეები დაფინანსდებიან -80 % (თანაგადახდა 20%).
3) ყველა სხვა კატეგორიის პაციენტი დაფინანსდება- 70 % (თანაგადახდა 30%).
-პაციენტისთვის ორი კოდის მინიჭების შემთხვევაში ძვირადღირებული კოდი დაფინანსდება კომპონენტით განსაზღვრული პროპორციების მიხედვით, ხოლო მეორე კოდი კომპონენტით აღებული ვალდებულების 50%-ით.
ქვეპროგრამით გათვალისწინებული მომსახურება არ გავრცელდება სახელმწიფოს ბიუჯეტით დაფინანსებული სამედიცინო პროგრამების მოსარგებლეებზე.
ინდივიდუალური და კორპორაციული დაზღვევის მოსარგებლეების მკურნალობა პირველ რიგში დაფინანსდება სადაზღვევო ლიმიტის ზღვრული ტარიფით, დარჩენილი თანხის დაფარვაზე გავრცელდება ქვეპროგრამა შესაბამისი პროპორციების დაცვით.
პროგრამის განხორციელებისთვის მომავალი წლის ბიუჯეტში იგეგმება 1 218 000 ლარის გათვალისწინება.
