"დღეის მდგომარეობით, მიხეილ სააკაშილის დაკითხვა რომ განხორციელდეს, ან მით უფრო ვისაუბროთ მის პასუხისგებაში მიცემაზე, ასეთი წინაპირობა არ არსებობს,"- ამის შესახებ საქართველოს მთავარმა პროკურორმა არჩილ კბილაშვილმა პრემიერ-მინისტრ ბიძინა ივანიშვილის მიერ ფრანგული გამოცემა "ფრანს პრესისთვის" მიცემულ ინტერვიუში გაკეთებული განცხადების კომენტირებისას ისაუბრა, სადაც საქართველოს მთავრობის ხელმძღვანელი ქვეყნის პრეზიდენტს პოლიტიკურ გვამს უწოდებს.
"ამასთან დაკავშირებით შემიძლია ვთქვა, რომ მთავარ პროკურატურაში არაერთი საქმის გამოძიება მიმდინარეობს, რომელიც სახელმწიფოს სახსრების გამოყენების კანონიერებას, სხვა თემატიკას შეეხება და ალბათობა იმისა, რომ მიხეილ სააკაშვილი იქნას დაკითხული, რასაკვირველია არსებობს. მაგრამ დღეის მდგომარეობით, ახლა, ამჟამად მისი დაკითხვა რომ განხორციელდეს, ან მით უფრო ვისაუბროთ მის პასუხისგებაში მიცემაზე, ასეთი მზაობა, ასეთი წინაპირობა ამ დროისათვის არ არსებობს. ეს არის დღეანდელი მოცემულობა, დღევანდელი რეალობა,"- განაცხადა არჩილ კბილაშვილმა.
ცნობისთვის, საქართველოს პრემიერ-მინისტრის ბიძინა ივანიშვილის განცხადებით, პრეზიდენტი მიხეილ სააკაშვილი სასამართლოს წინაშე წარსდგება და დაიკითხება.
ივანიშვილი ფრანგული გამოცემა "ფრანს პრესისთვის" მიცემულ ინტერვიუში ქვეყნის მოქმედ პრეზიდენტს პოლიტიკურ გვამს უწოდებს და აღნიშნავს, რომ პროკურორები გადაწყვეტილებებს გამოძიებაზე დაყრდნობით მიიღებენ, ამიტომ ეს არ იქნება პოლიტიკურად მოტივირებული პროცესი.
"ჩემი ზრით, სააკაშვილს ბევრ შეკითხვაზე აქვს პასუხი გასაცემი და სწორედ ამიტომ, არსებობს დიდი ალბათობა, რომ ის დაიკითხოს,"- განაცხადა ივანიშვილმა.
