იტალიის ხელისუფლებამ ღიად განაცხადა, რომ არ აპირებს ხელი შეუშალოს Air France-KLM-ს ავიაკომპანია Alitalia-ს 50 %-იანი წილი შეიძინოს.
აღსანიშნავია, რომ ფრანგულ-ჰოლანდიური Air France-KLM-ი იტალიური ავიაკომპანიის 25 %-ის უკვე ფლობს. იტალიის ტრანსპორტის მინისტრის მაურიციო ლულის განმარტებით, იტალიის მთავრობა არ აპირებს კერძო კომპანიის საქმეებში ჩარევას, თუმც იმედი აქვს, რომ Air France-ი გაითვალისწინებს იმას, რომ Alitalia ქვეყნისთვის სტრატეგიული აქტივია.
შეგახსენებთ, რომ 2008 წელს, "თავისუფალი ხალხის" პარტიის ლიდერმა სილვიო ბერლუსკონემ დაბლოკა ფრანგული კომპანიის პირველი მცდელობა შეეძინა იტალიური კომპანიის წილი, თუმცა საბოლოოდ ფრანგულ-ჰოლანდიურმა კონკურენტმა იტალიური ავიაგადამზიდავის წილის შეძენა მოახერხა. 2012 წელს Alitalia-მ 280 მლნ ევრო დაკარგა, მიმდინარე წლის დანაკარგად კი ანალიტიკოსები 350 მლნ ევროს ასახელებენ.
