პატიმართა შეწყალების კომისია არსებული შემადგენლობით დღეს ბოლო სხდომას გამართავს.
შეწყალების კომისიის თავმჯდომარის ელენე თევდორაძის განცხადებით, სხდომის მონაწილეები 400-მდე საქმეს განიხილავენ, რომელთა შორის 7 არასრულწლოვანი და 48 ქალია, თუმცა შეწყალების მსურველი პატიმრების უმრავლესობა სასჯელს მძიმე დანაშაულის ჩადენისთვის იხდის, რის გამოც, სავარაუდოდ მათ მცირე ნაწილს გაეწევა კომისიის რეკომენდაცია.
"ეს სხდომა ამ კომისიის შემადგენლობით იქნება უკანასკნელი, იმიტომ, რომ მოვა ახალი პრეზიდენტი და ალბათ, ახალ კომისიას შექმნის. ახლა შემოსულია 400-მდე საქმე, აქედან 48 ქალია და 7 არასრულწლოვანი. უნდა ითქვას, რომ ყველა საქმე ძალიან მძიმეა,"- განაცხადა ელენე თევდორაძემ.
პატიმრების შეწყალების დოკუმენტს ქვეყნის პირველმა პირმა უნდა მოაწეროს ხელი. ეს პრეზიდენტის რანგში მიხეილ სააკაშვილის ბოლო შეწყალება იქნება.