როგორც ივანიშვილმა ცენტრალური რადიოსადგურების და ბეჭდური გამოცემების წარმომადგენლებთან შეხვედრისას აღნიშნა, ყოფილი პრემიერ მინისტრის საქმის გამოძიება აქტურად გრძელდება და რიგ საკითხებში წინ გადადგმული ნაბიჯებიცაა.

პრემიერ-მინისტრი სხვა გახმაურებული საქმეების საკითხსაც შეეხო და აღნიშნა, რომ სანდრო გირგვლიანის და სხვა სისხლის სამართლის საქმეებზე ძიება აქტიურად მიმდინარეობს, ამიტომ ექსპერტების შეფასებები, რომ კონკრეტული საქმეები თაროებზე შემოდეს, სიმართლეს არ შეესაბამება.

უკვე ცნობილია, რომ ზურაბ ჟვანიას გარდაცვალების სისხლის სამართლის საქმეში აღმოჩენილი ახალი გარემოებების გამო, საქმეზე ოფიციალური ვერსია უახლოეს მომავალში შესაძლოა, სრულიად შეიცვალოს. ჟვანიას და მასთან ერთად გარდაცვლილი ქვემო ქართლის გუბერნატორის ყოფილი მოადგილის რაულ უსუპოვის საქმისთვის უბედური შემთხვევის კვალიფიკაციის შეცვლის მიზეზი შესაძლოა, საქმეში აღმოჩენილი ახალი მტკიცებულებები გახდეს.

რაულ უსუპოვის მამა იაშირ უსუპოვი TV-3-სთვის მიცემულ ინტერვიუში აცხადებს, რომ მომხდარიდან 8 წლის შემდეგ საქმის დალუქული მტკიცებულებების გახსნის შედეგად დაგენილია, რომ მისი შვილის ტანსაცმელი დასვრილია, რის გამოც ოჯახს უჩნდება ეჭვი, რომ სიკვდილამდე რამდენიმე საათით ადრე რაულ უსუპოვი ფიზიკური ძალადობის მსხვერპლი გახდა.

ამასთან, გარდაცვლილის მამა აღნიშნავს, რომ რაულ უსუპოვის ერთ-ერთი ფეხსაცმელი, რომელიც მტკიცებულებებიდან გაუჩინარებული იყო, აღმოჩნდა, რომ ის საქმეში დევს, თუმცა სრულიად განსახვავეული ზომის, ფორმის და სხვა ბრენდის.

იაშირ უსუპოვის თქმით, შესაძლოა ადგილი ჰქონდეს მტკიცებულებების გაყალბებას და ხელახალი ძიების დასრულების შემდეგ, საქმეს უბედური შემთხვევის კვალიფიკაცია შეეცვალოს და მკვლელობის კვალიფიკაცია მიეცეს.

"მალე ყველა დავინახავთ, რომ ოფიციალური ვერსია თავდაყირა დადგება. ეს იყო პოლიტიკური ხასიათის დაგეგმილი მკვლელობა და ეს ყველამ იცის. მალე დადგინდება, რომ გაზით არ არიან მოწამული. ჩემი შვილი თუ არა, მაშინ სხვა ვინმე იქნებოდა იქ სცენარის გასაფორმებლად. დადგეს უაზრო სცენარი, რომლისაც თვითონაც არ სჯერათ. რომ გახსნეს მტკიცებულებები და ვნახეთ შარვალი, ის ისეა დასვრილი ტალახით, რომ იმ შარვლით ქუჩაში არავინ ივლის, მით უმეტეს თანამდებობის პირი. ეს იმას ნიშნავს, რომ იქ მოხდა რაღაც ჩხუბი და შეხლა-შემოხლა,"- განაცხადა იაშირ უსუპოვმა და დასძინა, რომ თუ უახლოეს პერიოდში აღნიშნული საქმის ძიება სათანადო შედეგით არ დასრულდება, არ არის გამორიცხული ზურაბ ჟვანიას და რაულ უსუპოვის გვამების ეგსჰუმაციაც მოხდეს.

არსებული ინფორმაციით, საქართველოს მთავარ პროკურატურაში განახლებული საქმის ძიება ფინალურ სტადიაშია და ახალი მოწმეებიც დაიკითხნენ, რის შედეგდაც აღმოჩენილია ახალი გარემოებები.

შეგახსენებთ, რომ საქართელოს ყოფილი პრემიერ-მინისტრის ზურაბ ჟვანიას და ქვემო ქართლის გუბერნატორის ყოფილი მოადგილის რაულ უსუპოვის ცხედრები საბურთალოს ქუჩის 53-ში მდებარე ერთ-ერთ საცხოვრებელ ბინაში 2005 წლის 3 თებერვალს აღმოაჩინეს.