საქართველოს განათლების და მეცნიერების მინისტრის მოადგილის ლია გიგაურის განცხადებით, სამართლებრივი განათლების მიღების მიზნით ქვეყანაში მოქმედი საჯარო სკოლების მოსწავლეები ახალ სასწავლო კურსს გაივლიან, რომლის მიზანიც ე.წ. ქურდული სამყაროს, რეკეტის და კიბერდანაშაულის თაობაზე დეტალური ინფორმაციის მიღება იქნება.
როგორც გიგაურმა "ჯი-ეიჩ-ენთან" საუბრისას განმარტა, აღნიშნული სამართლებრივი განათლების პროგრამა ამერიკის შეერთებული შტატების მთავრობის მხარდაჭრით 2008 წლიდან 100-მდე სკოლაში ისწავლებოდა და კურსის ეფექტურობის გამო, მისი ყველა სკოლაში დანერგვა გადაწყდა.
"გაკვეთილის მიზანია სამართლებრივი ცნობიერების ამაღლება. ეროვნული სასწავლო გეგმით ეს როგორც ცალკე საგანი არ არის შესული. სამართლებრივი განათლება სამოქალაქო განათლების ნაწილია,"- განაცხადა გიგაურმა.
განათლების მინისტრის მოადგილის თქმით, საქართველოს ორგანიზებულ დანაშაულთან ბრძოლის ერონული სტრატეგიის დოკუმენტში განათლების და მეცნიერების სამინისტროს თავისი ვალდებულებები აქვს და ეს ვალდებულებები სამოქალაქო საკითხებთან მიმართებაში მოსწავლეების ინფორმირება და სათანადოდ განათლებაა.
"ამიტომ, სამოქალაქო განათლების ფარგლებში არსებული კურსის გაძლიერება ხდება და დამატებითი დამხმარე სახელმძღვანელო შედის 7-ე და 9-ე კლასებში. თუმცა, ამ სახელმძღვანელოსაც და სამართლებრივი განათლების პროგრამასაც პილოტი უკვე გავლილი აქვს 2008 წლიდან, რადგანაც ეს პროგრამა დაიწყო ორგანიზაცია "ჰარმონიამ" ამერიკის მთავრობის დაფინანსებით. პილოტირება ხდებოდა მხოლოდ პროექტის ფარგლებში შერჩეულ სკოლებში. 100-ზე მეტმა სკოლამ გაიარა პილოტირება როგორც 7-ე, ასევე 9-ე კლასში, სახელმძღვანელოები მომზადებულია და შარშან პილოტირება გატარდა მანდატურებთან მიმართებაშიც, რადაგან გადამზადდნენ მანდატურები თუ როგორ უნდა წაეყვანათ გაკვეთილი სადამრიგებლო საათზე 7-ე კლასის მოსწავლეებთან,"- განაცხადა ლია გიგაურმა.
გიგაური ასევე აღნიშნავს, რომ საქართველოს ორგანიზებულ დანაშაულთან ბრძოლის ეროვნული სტრატეგიის დოკუმენტში სამი მიმართულება არსებობს, რომლის შესახებაც განათლების სამინისტრო მოსწავლეების ინფორმირებას ახდენს და ეს მიმართულებებია - ე.წ. ქურდული სამყარო, რეკეტი და კიბერდანაშაულის წინააღმდეგ ბრძოლა.
"ეს სამართლებრივი კულტურის საკითხების შემსაწავლელ სასწავლო კურსს, რომელსაც სადამრიგებლო საათზე ახლა უკვე ატარებს მანდატური და კლასის დამრიგებელი, ჰქვია სამართლებრივი კულტურა და ტარდება სმოქალაქო განათლების განათლების ფარგლებში სამოქალაქო განათლების მასწავლებლის და მოწვეული სამართალდამცველის მიერ ერთობლივად. ეს არის ძალიან პოპულარული კორსი საგანმანათლებლო სივრცეში, ამიტომ ჩვენ გადავწყვიტეთ რომ ეს ყოფილიყოპ პროექტის ფარგლებში შერჩეული სკოლები, არამედ ყველა სკოლას ჰქონოდა წვდომა,"- დასძინა გიგაურმა.
ლია გიგაურმა "ჯი-ეიჩ-ენთან" საუბრისას განმარტა, რომ ბევრ სკოლაში, სადაც უკვე პილოტი გავლილი იყო და გამოცდილება არსებობდა, საგანმანათლებლო პროგრამის აღნიშნული კურსის შესწავლა სასწავლო წლის დაწყებასთან ერთად დაიწყო, სხვა სკოლებში კი მანდატურების გადამზადების შემდეგ დაიწყება.
"შესაბამის კადრებს ჩაუტარდათ გადამზადებები და ტრენინეგები როგორ უნდა ასწავლონ ეს საგანი და ახლა ჩვენ გვჭირდება სხვა კადრების გადამზადება მათი საშუალებით. მანდატურების გადამზადების პროგრამა ეტაპობრივად მიდის და ვინც იქნება გადამზადებული, შესაბამისად საწავლო კურსის სწავლებაც იმ სკოლებში დაიწყება,"- აღნიშნა მან.
სკოლის მოსწავლეების სამართლებრივი ცნობიერების ამაღლებაზე გათვლილი სასწავლო კურსი 7-ე კლასის მოსწავლეებისთვის სულ 14 - 15 მეცადინეობას, ხოლო 9-ე კლასის მოსწავლეებისთვის 22 - 23 მეცადინეობას მოიცავს. ამასთან, სასწავლო პროგრამის ხანგრძლივობა დამოკიდებული იქნება სამართლადამცველების და მასწავლებლების შეთანხმებაზე, თუ როდის და რა პერიოდულობით დაგეგმავენ ერთობლივ გაკვეთილებს.
"აქედან გამომდინარე, კურსის ხანგრძლივობა დამოკიდებულია როგორ შეუთანხმდება სამართალდამცავი მასწავლებელს, როდის მოხერხდება მისი მიწვევა. 9-ე კლასის და 7-ე კლასის დამრიგებლებმა უნდა შექმნან სპეციალური განრიგი, ანუ გაკვეთილები ტარდება ამ საგანში , მაგრამ როდესაც იქნება მოწვეული სპეციალისტი, მაშინ ჩატარდება გაკვეთილები. ბევრ სკოლაში უკვე დაწყებულია და წლის ბოლომდე ყველა სკოლაში უნდა იყოს სიახლე დანერგილი. საგნის სახელი ასეთია: მეშვიდე კლასში - სამართლებრივი კულტურის საწყისები და მეცხრეში - სამართლებრივი კულტურა,"- განაცხადა გიგაურმა.
განათლების მინისტრის მოადგილე ასევე აღნიშნავს, რომ პროექტის ფარგლებში სკოლის მოსწავლეების მიერ სასჯელაღსრულების დაწესებულების მონახულება არ ზის, თუმცა მოზარდები სამართალდამცავი უწყებების თანამშრომელთა მუშაობის სპეციფიკის გაცნობის მიზნით, პოლიციის განყოფილებებს და სასამართლო სხდომის დარბაზებს ეწვევიან.
"გასული წლების გამოცდილებამ გვაჩვენა, რომ თითოეულ სკოლაში არსებობდა მოთხოვნები იმასთან დაკავშირებით, რომ აინტერესებთ როგორ მუშაობენ სამართლადამცველები და როგორ ახდენენ მოზარდების მხრიდან ჩადენილი სამართლადარღვევების იდენტიფიცირებას. ეს ინტერესი გათვალისწინებული იქნა და მოსწავლეები გაეცნობიან მხოლოდ და მხოლოდ კრიმინალისტები და როგორ შეუძლიათ მათ აღმოაჩინონ კვალი. ასევე, სკოლა შეიძლება დაინტერესდეს და ჩვენ უზრუნველვყოფთ მოსწავლეების მიყვანას სასამართლო პროცესზე და დაესწრებიან ამ პროცესს. ანუ, სკოლის მიერ გამოთქმული სურვილის ფარგლებში ჩვენ ვთანამშრომლობთ შინაგან საქმეთა სამინისტროსთან და იუსტიციის სამინისტროსთან და ექნებათ ექსკურსიები, მაგრამ ეს ექსკურსიები არ მოიცავს სასჯელაღსრულების სისტემას,"- აღნიშნა ლია გიგაურმა.