თბილისის მერია განცხადებას ავრცელებს, რომელსაც გთავაზობთ უცვლელად:
"მიმდინარე წლის 26 სექტემბერს თბილისის მერიას განცხადებით მომართეს ბინათმესაკუთრეთა ამხანაგობებმა და აცნობეს, რომ 2013 წლის 27 სექტემბერს აპირებენ აქციის ჩატარებას თბილისის საკრებულოს შენობასთან. მათი პროტესტი გამოიწვია თბილისის საკრებულოს თავმჯდომარის, ირაკლი შიხიაშვილისა და უმრავლესობის მიერ მიღებულმა გადაწყვეტილებამ, ამხანაგობების განვითარების ხელშეწყობის პროგრამიდან 10 მილიონი ლარის ამოღების თაობაზე, რის გამოც შეუძლებელი გახდა საცხოვრებელ კორპუსებში უკვე დაგეგმილი ასეულობით ინფრასტრუქტურული პროექტის განხორციელება.
შემოსულ განცხადებასთან დაკავშირებით თბილისის მერია განმარტავს, რომ იგი სრულ მხარდაჭერას უცხადებს აღნიშნულ საკითხზე ბინათმესაკუთრეთა ამხანაგობების მოთხოვნას და მზადაა მის ხელთ არესებული ყველა კანონიერი რესურსი გამოიყენოს მოცემული პრობლემის გადასაწყვეტად, რომელიც წარმოიქმნა თბილისის საკრებულოს უმრავლესობის სრულიად გაუცნობიერებელი გადაწყვეტილებით და რომელმაც ამხანაგობების ინფრასტრუქტურული პროექტების დაფინანსების საკითხში თბილისის რაიონების გამგეობების სრული პარალიზება გამოიწვია.
ერთხელ განვმარტავთ, რომ თბილისის საკრებულოს უმრავლესობის გადაწყვეტილებით თბილისის ბიუჯეტის შესაბამისი მუხლიდან ამოღებული 10 მილიონი ლარი განკუთვნილი იყო ამხანაგობებისათვის სხვადასხვა ინფრასტრუქტურული პროექტების დაფინანსებისათვის. საგულისხმოა, რომ ქალაქის საკრებულოს ამ გადაწყვეტილებით უკვე სექტემბრიდან თბილისის რვა რაიონის გამგეობა საერთოდ ვეღარ ახერხებს ბინათმესაკუთრეთა ამხანაგობების მიერ წარმოდგენილი პროექტების დაფინანსებას, რამაც უდავოდ მძიმე მდგომარეობაში ჩააყენა თბილისის მაცხოვრებლები", - ნათქვამია განცხადებაში.