"ყველაზე მეტად დღეს ის არის ჩემი განცდის, შიშის, საფრთხისა და შეშფოთების საგანი, რომ ჩვენი ქვეყანა სამუდამოდ არ აღმოჩნდეს დროსა და სივრცეში აცდენილი თავის ბედთან," - ამის შესახებ საქართველოს პრეზიდენტმა მიხეილ სააკაშვილმა ამერიკის შეერთებულ შტატებში ოფიციალური ვიზიტის ფარგლებში ნიუ იორკში მცხოვრებ ქართულ დიასპორასთან შეხვედრაზე ისაუბრა.
ქვეყნის პირველმა პირმა ძირითადი ყურადღება ტერიტორიული მთლიანობის და სუვერენიტეტის კუთხით საქართველოს საგარეო საფრთხეებსა და საგარეო პოლიტიკურ კურსთან დაკავშირებულ საკითხებზე გაამახვილა.
მიხეილ სააკაშვილმა საქართველოსა და სხვა ქვეყნების მიმართ რუსეთის აგრესიულ პოლიტიკასაც გაუსვა ხაზი და ქართული დიასპორის წარმომადგენელთა შეკითხვებს უპასუხა.
„რუსეთის პერსპექტივა ძალიან რთულია. ვინც არ უნდა იყოს რუსეთის შემდეგი მმართველი - ნაციონალი თუ ლიბერალი - ამ ჯგუფებს შორის სრული კონსესუსია იმასთან დაკავშირებით, რომ რუსეთი კავკასიიდან უნდა წავიდეს. ოფიციალურად თუ არაოფიციალურად, მათ მთელი კავკასიიდან მოუწევთ ჯარების გაყვანა და რეგიონის დატოვება. ეს, პრინციპში, აბსოლუტურად გარდაუვალია და უახლოესი წლების პერსპექტივაა. ეს არის ზუსტად ის, რაზეც ყველაზე ხშირად ვფიქრობ ხოლმე ბოლო პერიოდში... ის, რომ რუსეთი ცუდ ფორმაშია, უკვე ყველამ გაიგო; ის, რომ რუსეთი ახლანდელი საფრთხეა, ესეც ყველამ გაიგო, მაგრამ მე სხვა პრობლემა მაღელვებს - პატარა ქვეყანამ არ უნდა დაკარგოს საკუთარი შანსი. დღეს დაიწყო რუსეთის დიდი დაღმასვლა. მაგამ მე ვშიშობ, საქართველომ არ გაასწროს ამ მიმართულებით,"- განაცხადა მიხეილ სააკაშვილმა.
