საქართველოს პრეზიდენტის მიხეილ სააკაშვილის განცხადებით, საქართველო რუსეთთან მიმართებაში საფრთხის წინაშე დგას და არის საშიშროება, რომ მოვლენები უახლოეს მომავალში გაუარესდეს.
როგორც სააკაშვილმა "ამერიკის ხმის" ქართული სამსახურისთვის მიცემულ ინტერვიუში აღნიშნა, გაეროს გენერალურ ასამბლეაზე მისი გამოსვლისას საუბრის ძირითადი დრო ქვეყნის საგარეო საფრთხეებს და დიცსა და დვანში შექმნილ ვითარებას დაეთმობა.
ქვეყნის პირველი პირის თქმით, "გუშინ მავთულხლართებთან დაკავშირებით ჯონ კერისთან საკმაოდ დეტალური საუბარი ჰქონდა და კარგია, რომ ეუთოში ამერიკელების მისიამ გააკეთა ამ თემაზე განცხადება, მაგრამ რა თქმა უნდა, ქართულმა მხარემ უნდა გააგრძელოს მათთან თანამშრომლობა, იმიტომ რომ ეს საკითხი სერიოზული შემოტევაა ქართულ სახელმწიფოებრიობაზე".
"ასევე გუშინ პრეზიდენტ ობამას ვთხოვე, რომ ამ თემასთან დაკავშირებით ყურადღება არ მოადუნოს. გაეროში საქართველოს ძალიან კარგი ელჩი, კახა იმნაძე ყავს რომელიც სულ სხვა ბანაკიდან იყო, მაგრამ არ შემიძლია არ დავაფასო მისი პროფესიონალიზმი. ორ დღეში არის სუამის შეხვედრა, რომლისთვისაც ასევე უნდა მოვემზადოთ. გვაქვს კარგი კოორდინაცია საგარეო საქმეთა სამინისტროსთან. საქართველო რუსეთთან მიმართებაში საფრთხის წინაშე დგას და ვშიშობ მოვლენები უახლოეს მომავალში გაუარესდება. მე ეს გუშინ პრეზიდენტ ობამასაც ვუთხარი. რუსეთის აგრესიულ ქმედებებზე დეტალურ და ვრცელ გამოსვლას ვამზადებ ხვალისთვის. მინდა რუსეთთან დაკავშირებით ძალიან გახსნილად ვილაპარაკო. რამდენიმე დღის წინ ლიტვის პრეზიდენტმა, რომელიც ტრადიციულად ჩვენი მეგობარია, განაცხადა, რომ უკეთესი იქნებოდა საქართველოს ნაცვლად უკრაინისთვის და მოლდოვასთვის ხელი შეეწყოთ ევროკავშირში გაწევრიანებისთვის, რადგან საქართველოს ევრაზიის ერთობაშიც აქვს ინტერესები. ასეთი განცხადება ევროკავშირის პრეზიდენტის მხრიდან შემაშფოთებელია. მე არ ვიცი, ჩვენმა პრემიერ მინისტრმა რა ელაპარაკა მას, მაგრამ ჩვენ ვცდილობთ ავუხსნათ, რომ ერთია რას იტყვის პრემიერი, ხოლო მეორეა ქართველი ხალხის სურვილი. ქართველ ხალხს უნდა ევროპაში ინტეგრაცია და არ შეიძლება ვამბობდეთ, რომ ჯერ სხვა ქვეყნებს უნდა შევუწყოთ ხელი. მე გახსნილი ვარ ყველანაირი შენიშვნის მისაღებად შინაგან საქმეთა სამინისტროდან. ჩვენ გვაქვს კარგი სამუშაო ურთიერთობა. ერთად ვმუშაობთ არაღიარების თემაზე და აქაც ბევრი აზრთა გაცვლა-გამოცვლა იყო. საგარეო საქმეთა სამინისტროში არის სახელმწიფო აპარატი, რომელიც, მიუხედავად პოლიტიკური რყევებისა, არის ჯანსაღი. ვინც არ უნდა იყოს მომავალში პრეზიდენტი, მაინც უნდა გვახსოვდეს, რომ ერთად უნდა ვიმუშაოთ.
რუსეთი როგორც საქართველოში თამაშობდა ოკუპანტის და სამშვიდობო ჯარის როლს, იგივეს აკეთებს სირიასთან მიმართებაში, მაგრამ ამ თემიდან მსოფლიოს ყურადღების გადატანა შეუძლებელია. ასე რომ, დისკუსიები კიდევ გაიმართება ამ თემასთან დაკავშირებით,"- განაცხადა მიხეილ სააკაშვილმა.