შევჩენკოს თქმით, გასული წლების განმავლობაში მას საქართველოში ჩამოსვლა ყოფილი ხელისუფლების წარმომადგენლების წინააღმდეგობის გამო ეკრძალებოდა და ქვეყანაში მხოლოდ მთავრობის შეცვლის შემდეგ ჩამოვიდა, პატრიარქს შეხვდა, ეკლესიები მოინახულა და ბედნიერია.

"საქართველოში პატრიარქის კურთხევით მოვედი. დიდი ხანია მას ვიცნობ. მეც მართლმადიდებელი ვარ და ჩემთვის მისი კურთხევა ძალიან მნიშვნელოვანია. იმის გამო, რომ წინა ხელისუფლებამ არ შემომიშვა, ვორჭოფობდი ჩამოსვლას. ილია მეორეს კურთხევის შემდეგ, გადავწყვიტე, რომ საქართველოში ჩამოვსულიყავი. დიდუბის ეკლესიაში შევხვდი პატრიარქს, მოვინახულე ყველა ეკლესია და ბედნიერი ვარ,"- ნათქვამია მაქსიმ შევჩენკოს განცხადებაში, რომელიც სოციალურ ქსელში გავრცელდა.

შეგახსენებთ, რომ რუსი ჟურნალისტი საქართველოში ყოფილ პარლამენტარ ლევან პირველთან ერთად ჩამოვიდა. პირველი და მაქსიმ შევჩენკო ორშაბათს TV-3-შიც ერთად გამოჩნდნენ. ტელეკომპანიის სტუდიაში მიწვეულმა ლევან პირველმა გადაცემის წამყვანის ინგა გრიგოლიას კითხვაზე, თუ რატომ მოძრაობს იგი გამოკვეთილად ანტიქართული იდოლოგიის მატარებელ მაქსიმ შევჩენკოსთან ერთად, უპასუხა, რომ "მაქსიმ შევჩენკოსთან კარგი ურთიერთობა აქვს და ტელევიზიაში ინგა გრიგოლიასთვის გასაცნობად მიიყვანა".

"შევჩენკო ცნობილი იყო ანტიქართული განცხადებებით, აფხაზეთის დამოუკიდებლობასთან დაკავშირებული განცხადებებითაც. იგი არის ძალიან სერიოზული პიროვნება, იმიტომ, რომ ის მხოლოდ ჟურნალისტი არ არის. მაგრამ ყველაზე საინტერესო იქნება, ჩვენთან მეგობრობის შემდეგ ამასთან დაკავშირებული კითხვები დაუსვან შევჩენკოს. პუტინი იქნება თუ შევჩენკო, თუ შეძელი და მათან იპოვე საერთო ენა და დღეს ის სხვანაირად ლაპარაკობს, მე ვთვლი, რომ ეს ყველა ქართველმა უნდა გააკეთოს. ნაწყენი ბავშვივით მიტრიალება და ისტერიკების ატეხვა არასწორია,"- განაცხადა ლევან პირველმა.