"მანამ, სანამ კანონი შეიცვლებოდა, ჩვენ პრაქტიკაში დავამკვიდრეთ, რომ კბილაშვილის უწყება გათავისუფლდა პოლიტიკური გავლენებისგან, მათ შორის იუსტიციის მინისტრისა. ამიტომ შეთანხმება, მათ შორის ბედუკაძის თემაზე, ჩემთან სამწუხაროდ არ მომხდარა, რადგან ეს ჩემთვის იყო რადიოდან შეტყობილი "სიურპრიზი" და მხოლოდ ამის შემდეგ ვთხოვე მე მას მისი შუამდგომლობა გამოეგზავნა, რომელსაც დღესაც არ ვეთანხმები, მაგრამ ეს არ ნიშნავს იმას, რომ მე მისი მიდგომები და მუშაობა არ მომწონს," ამის სესახებ საქარტველოს იუსტივიის მინისტრმა თეა წულუკიანმა TV-3-ის გადაცემა "დიდ პოლიტიკაში" სტუმრობისას ისაუბრა.
მინისტრის თქმით, დღევანდელ მთავრობაში არის უწყებები, რომელთა საქმიანობის მიმართ გარკვეული პრეტენზიები აქვს და მათი მუშაობის უკეთესად წარმართვაც შეიძლებოდა და წულუკიანის შეფასებით, ამის ერთ-ერთი მაგალითი პროკურატურაა.
"რა თქმა უნდა, არის ზოგიერთი სფერო, სადაც ვისურვებდი, რომ უკეთესად იყოს საქმე. პირველ რიგში, არ დაგიმალავთ და მახსენდება პროკურატურა, მაგრამ ამას აქვს თავისი ობიექტური მიზეზებიც. სამართლიანობის აღდგენის პროცესი რა რიტმითაც უნდა წასულიყო, იმ რიტმით რა თქმა უნდა, ვერ მიდის, მაგრამ ადრე თუ გვიან ეს პროცესი მივა ლოგიკურ დასასრულამდე. მთავარია ამ გზაზე პროკურატურამ არ დაუშვას შეცდომები, იმიტომ, რომ ჩვენ ვნახეთ, რომ შემდეგ შეცდომები რთული გამოსასწორებელია. რაღაც საკითხებზე ჩემსა და არჩილ კბილაშვილს შორის შეთანხმება არ დგება, იმიტომ, რომ ჩვენ თავიდანვე ვთქვით, წინასაარჩევნო დაპირებაც კი იყო, რომ პროკურატურა დამოუკიდებლობის მაღალ ხარისხს მიიღებდა იუსტიციის მინისტრისგან, რომელიც ამავე დროს აღარ უნდა ყოფილიყო პროკურორი. არჩილი გახლავთ ის ადამიანი, რომელიც სწორი კატეგორიებით აზროვნებს და მართალია სამართლიანობის აღდგენის რიტმი საზოგადობას და მეც არ მაკმაყოფილებს, იმიტომ, რომ იმდენად დიდი იყო უსამართლობა, რომ ჩვენ სულსწრაფებიც კი ვართ ბევრ შემთხვევაში, რომ ბევრი უსამართლობა რაც შეიძლება დიდი ტემპით გამოსწორდეს. მაგრამ არჩილს აქვს მიდგომა, რომელიც გრძელვადიან პერსპექტივაში სწორია,"- განაცხადა თეა წულუკიანმა.