პრეზიდენტობის კანდიდატი სერგო ჯავახიძე დვანში განვითარებულ მოვლენებთან დაკავშირებით განცხადებას ავრცელებს:
"საქართველოს ყოველდღიურად 200 მეტრს აჭრიან და გვპარავენ ქვეყანას! საოკუპაციო ძალების მიერ საზღვრის გადმოწევის პროცესი გრძელდება და სოფელ დვანში სამუშაოები კვლავ განახლდა. ამის ფონზე ნაციონალური მოძრაობა და ოცნება კოაბიტაციურ ცირკს აგრძელებს. მმართველი და მთავარი ოპოზიციური ძალა წინასაარჩევნოდ ქულების დაწერის მიზნით, შექმნილ ვითარებას ერთმანეთს აბრალებს და პრობლემის აღმოსაფხვრელად ნაბიჯებს არ დგამს.
რეალობას ჩამორჩენილი საგარეო საქმეთა მინისტრი, მაია ფანჯიკიძე კი კარასინისა და აბაშიძის შეხვედრებით ამაყობს და აცხადებს, რომ თურმე რუსეთთან დიალოგში გარკვეულ საკითხებთან დაკავშირებით დადებით შედეგს მიაღწიეს. ფაქტია, რომ მთავარი პრობლემა ჩვენი ტერიტორიული მთლიანობაა. კიდევ უფრო დაძაბული ვითარების დროს სასწრაფოდ, კონკრეტული ზომების მიღებაა საჭირო და მიმაჩნია, რომ ასეთ მტკივნეულ თემებს საგარეო საქმეთა მინისტრი მეტი პასუხისმგებლობით უნდა მოეკიდოს.
პრემიერი კი ისევ იმ საზოგადოების შანტაჟითაა დაკავებული, რომლის ნდობაზე საუბრობს და პრობლემებზე ყურადღების გამახვილების ნაცვლად მარგველაშვილის საარჩევნო კამპანიითაა დაკავებული"- აცხადებს სამართლიანი საქართველოს ლიდერი და პრეზიდენტობის კანდიდატი სერგო ჯავახიძე.
მასალის გამოყენების პირობები