საზღვარგარეთ მყოფმა ამომრჩევლებმა საპრეზიდენტო არჩევნებში მონაწილეობის მიზნით საკონსულო აღრიცხვაზე 6 ოქტომბრის ჩათვლით უნდა გაიარონ. ამის შესახებ საგარეო უწყების განცხადებაშია აღნიშნული, რომელსაც ,,ჯი-ეიჩ-ენი" უცვლელად გთავაზობთ: ,,საქართველოს პრეზიდენტის 2013 წლის 27 ოქტომბრის არჩევნებთან დაკავშირებით საზღვარგარეთ მყოფი ამომრჩევლების საყურადღებოდ საქართველოს პრეზიდენტის 2013 წლის 27 ოქტომბრის არჩევნებში მონაწილეობის მისაღებად, აუცილებელია: საქართველოს მოქალაქე იმყოფებოდეს საკონსულო აღრიცხვაზე, ან თუ არ იმყოფება საკონსულო აღრიცხვაზე, მაშინ 2013 წლის 6 ოქტომბრის ჩათვლით, გაიაროს რეგისტრაცია ადგილსამყოფელ ქვეყანაში შექმნილ საუბნო-საარჩევნო კომისიაში, ან საკონსულო დაწესებულებაში. რეგისტრაციის გავლის მიზნით საქართველოს მოქალაქემ უნდა წარადგინოს განცხადება ამომრჩეველთა სპეციალურ სიაში რეგისტრაციის მოთხოვნით და საქართველოს მოქალაქის პირადობის დამადასტურებელი მოწმობის, ID ბარათის, ან საქართველოს მოქალაქის პასპორტის ქსეროასლი. საარჩევნო უბანზე მისვლისას ამომრჩეველმა თან უნდა იქონიოს საქართველოს მოქალაქის პირადობის მოწმობა; ID ბარათი, ან საქართველოს მოქალაქის პასპორტი", _ნათქვამია განცხადებაში.