ვიზიტის ფარგლებში, საქართველოს საგარეო საქმეთა მინისტრი მაია ფანჯიკიძე და მინისტრის მოადგილე დავით ზალკალიანი გამართავენ არაერთ ორმხრივ შეხვედრას პარტნიორ სახელმწიფოებთან და გაეროს ინსტიტუტების ხელმძღვანელებთან. საგარეო საქმეთა მინისტრი მონაწილეობას მიიღებს გენერალური დებატების ფარგლებში გამართულ მრავალმხრივ და რეგიონულ თემატურ ფორუმებში.
გაერო-ს გენერალური ასამბლეის 68-ე სესიის პარალელურად, 2013 წლის 25 სექტემბერს, ქ. ნიუ-იორკში გაიმართება საქართველოს საგარეო საქმეთა მინისტრის მაია ფანჯიკიძის ტრადიციული არაფორმალური შეხვედრა ევროკავშირის წევრი ქვეყნების საგარეო პოლიტიკური უწყებების პოლიტიკურ დირექტორებთან.
შეხვედრას ასევე დაესწრებიან ევროპული საგარეო ქმედებათა სამსახურის (EEAS) გენერალური მდივნის მოადგილე ჰელგა შმიდი.
შეხვედრაზე ძირითადად ყურადღება გამახვილდება საქართველო-ევროკავშირის ურთიერთობების პრიორიტეტული მიმართულებების კუთხით „აღმოსავლეთ პარტნიორობის" ვილნიუსის სამიტისათვის დასახულ მიზნებსა და სამიტის შემდგომ თანამშრომლობის პერსპექტივებზე.
ნიუ-იორკში, გაეროს გენერალური ასამბლეის 68-ე სესიის პარალელურად დაგეგმილია საგარეო საქმეთა და უსაფრთხოების პოლიტიკის საკითხებში ევროკავშირის უმაღლესი წარმომადგენლის, ევროკომისიის ვიცე-პრეზიდენტის ქეთრინ ეშტონის არაფორმალური შეხვედრა „აღმოსავლეთ პარტნიორობის" ქვეყნების საგარეო საქმეთა მინისტრებთან.