არასამთავრობო ორგანიზაციათა თემატური ჯგუფი, რომლებმაც ლენტეხის მუნიციპალიტეტში ჩასვლის დროს გაეცნენ ლენტეხის გამგებლის თანამდებობიდან გათავისუფლების ფაქტს, აუცილებლად მიიჩნევენ საკითხით საქართველოს იუსტიციის მინისტრი თეა წულუკიანი დაინტერესდეს.
ორგანიზაციათა თემატური ჯგუფი მიიჩნევს, რომ აუცილებელია მინისტრი ლენტეხში ჩავიდეს და პრობლემას ადგილობრივებთან დიალოგში გაეცნოს, რადგანაც არსებული ფაქტობრივი და სამართლებრივი მასალები ცხადყოფს, რომ გამგებლის გათავისუფლება, დიდი ალბათობით, კანონდარღვევით განხორციელდა, ხოლო აღნიშნული ფაქტი პირდაპირ ეწინააღმდეგება მთავრობის უწყებათაშორისი კომისიის რეკომენდაციას, სადაც საპრეზიდენტო არჩევნების წინ, იმპიჩმენტის და მსგავსი პროცესების განხორციელება აკრძალულია.
ორგანიზაციები მოუწოდებენ იუსტიციის მინისტრს თეა წულუკიანს, როგორც ბოლნისში, ასევე ლენტეხშიც ადგილზე გაეცნოს მდგომარეობას.
გასულ კვირას, არასმთავრობო ორგანიზაციები და უწყებათაშორისი კომისიის წევრები ჩასულები იყვნენ ლენტეხში, სადაც ადგილზე იქნა შესწავლილი არსებული მდგომარეობა.
დოკუმენტების გაცნობისა და ადგილობრივი მუნიციპალიტეტის მესვეურებთან შეხვედრისას გაირკვა, რომ გამგებლის გადაყენება დარღვევებით მოხდა. ამის თაობაზე არც ერთი სამართლებრივი დოკუმენტი არ შესულა ძალაში და თავად იმპიჩმენტის პროცედურაც კანონის დარღვევით განხორციელდა.
აღსანიშნავია, რომ საქართველოს პროკურატურამ დაიწყო საქმის გამოძიება ლენტეხის საკრებულოს მიერ მიღებულ გადაწყვეტილებებთან დაკავშირებით და როგორც ჩანს, შეიძლება გამოიკვეთოს საკრებულოს თავმჯდომარის და ამჟამინდელი გამგებლის დანაშაულებრივი ქმედებები.
ორგანიზაციები: "უფლებადამცველთა გაერთიანება", "ახალგაზრდა ფინანსისტთა და ბიზნესმენთა ასოციაცია-აფბა", „ახალგაზრდა ადვოკატები", „სრულიად საქართველოს სახალხო დარბაზი", "საერთაშორისო იდეოლოგიური ფორუმი" და "ეკოტეკი" მოითხოვენ სიხადე შევიდეს ლენტეხის საკრებულის მიერ მიღებულ გადაწყვეტილებებში და რეაგირებისთვის იუსტიციის მინისტრს მიმართავენ.
მასალის გამოყენების პირობები