გაფართოებისა და ევროპული სამეზობლო პოლიტიკის საკითხებში ევროკომისარი შტეფან ფულე საქართველოში დაგეგმილ ევროპის ახალგაზრდული პარლამენტის საერთაშორისო სესიასთან დაკავშირებით სპეციალურ ვიდეომიმართვას ავრცელებს და აცხადებს, რომ მას იმედი აქვს, საქართველოში ოქტომბერში დაგეგმილი ღონისძიება ძალიან წარმატებული იქნება.
ფულეს განცხადებით, ევროკავშირი მოუთმენლად ელის საქართველოსთან პოლიტიკურ ასოცირებას და თავისუფალი ვაჭრობის სივრცის შექმნას.
"ვფიქრობ, საქართველო საუკეთესო ადგილია განსხვავებული პოლიტიკური და სოციალური ფონის მქონე ახალგაზრდების შესახვედრად, რომელთაც ენთუზიაზმი აერთიანებთ გამართონ დებატები და განიხილონ სხვადასხვა აქტუალური საკითხები. საქართველო ახალგაზრდა ქვეყანაა როგორც თანამედროვე დემოკრატიული სახელმწიფო, მაგრამ ის უძველესია თავისი კულტურით. ევროკავშირი საქართველოს გვერდით დგას როგორც მეგობარი და პარტნიორი. ჩვენ მოუთმენლად ველით ამ ქვეყანასთან პოლიტიკურ ასოცირებას და თავისუფალი ვაჭრობის სივრცის შექმნას. დარწმუნებული ვარ, რომ თბილისის სესია ძალიან წარმატებული იქნება და მოუთმენლად ველი მის შედეგებს,"- განაცხადა შტეფან ფულემ.
ევროპის ახალგაზრდული პარლამენტის საერთაშორისო სესიასთან დაკავშირებით რიგით 74-ე ღონისძიება თბილისში 4-დან 13 ოქტომბრამდე გაიმართება.
