საპარლამენტო უმცირესობის წევრის სერგო რატიანის განცხადებით, პრეზიდენტ მიხეილ სააკაშვილის მიერ თურქეთის 1 000-მდე მოქალაქისთვის საქართველოს მოქალაქეობის მინიჭების საკითხთან დაკავშირებით იუსტიციის მინისტრ თეა წულუკიანის დამოკიდებულება გასაკვირია, რადგან აღნიშნული შემთხვევა კულტურათაშორის ურთიერთობათა შემადგენელი ნაწილია.
"სამწუხაროა, რომ დღეს ჩვენ გვიწევს ადამიანებს ავუხსნათ ამ ადამიანთა მნიშვნელობა კულტურული ურთიერთობების და კულტურათაშორის დიალოგის, კეთილმზეზობლური ურთიერთობის განვითარების საქმეში. სწორედ ამიტომ, ამ ადამიანების სურვილი, რომ საქართველოს მოქალაქეები გახდნენ, და ამ საკითხზე პრეზიდენტის შესაბამისი გადაწყვეტილება საქართველოს სახელმწიფოს დიდ წარმატებას წარმოადგენს. სამწუხაროა, რომ დღეს ჩვენს პოლიტიკურ ოპონენტებს უნდა შევახსენოთ, რომ ჩვენს შორის პოლიტიკური განსხვავება ხედვებში არ უნდა ეხებოდეს საკითხებს, რომლებიც წარმოადგენენ საქართველოს ნაციონალურ ინტერესებს,"- განაცხადა სერგო რატიანმა.
შეგახსენებთ, რომ საქართველოს პრეზიდენტმა მიხეილ სააკაშვილმა 10 სექტემბერს თურქეთის 936 მოქალაქეს სახელმწიფო სერვისების განვითარების სააგენტოს გვერდის ავლით საქართველოს მოქალაქეობა მიანიჭა.
