სოფლის მეურნეობის სამინიტრო მინისტრის, შალვა ფიფიას მოსკოვში მოსალოდნელ ვიზიტს უარყოფს და განცხადებას ავრცელებს:
„როგორც საზოგადოებისთვის ცნობილია, სოფლის მეურნეობის სამინისტრომ ქართული სასმელებისა და სასოფლო-სამეურნეო პროდუქციის ექსპორტის ხელშეწყობის მიზნით, მნიშვნელოვანი ნაბიჯები უკვე გადადგა. მთავრობის ფორმირების პირველივე დღეებიდან აქტიურად მიმდინარეობდა მუშაობა ქართული პროდუქციისათვის რუსული ბაზრის გახსნის საკითხზე. გადადგმულია კონკრეტული ნაბიჯები და მიღწეულია მნიშვნელოვანი შეთანხმებები - ამ ეტაპზე 8 მლნ-მდე ღვინის ბოთლი, ალკოჰოლური სასმელები და მინერალური წყლები, ასევე დაბალრისკიანი პროდუქცია - დაფნა და მშრალი ხილი უკვე იყიდება რუსეთის ბაზარზე. თითოეული ამ გადაწყვეტილების შესახებ, საზოგადოება ინფორმირებული იყო საინფორმაციო საშუალებებით.
დღეს გავრცელებული ინფორმაცია კი, „მოსკოვში ქართველი მინისტრების საიდუმლო შეხვედრების" გამართვის შესახებ, რომელიც აჭარის ტელევიზის ეთერში, გადაცემაში „სამართალი ხალხისთვის" აჭარის ავტონომიური რესპუბლიკის მთავრობის მეთაურის არჩილ ხაბაძის მიერ გაკეთებულ განცხადებაზე დაყრდნობით გავრცელდა, სიმართლეს არ შეესაბამება. სოფლის მეურნეობის მინისტრი შალვა ფიფია რუსეთის ფედერაციაში ვიზიტს არ გეგმავს.
კიდევ ერთხელ ვაცხადებთ, სოფლის მეურნეობის მინისტრის ნებისმიერი ვიზიტისა და შეხვედრის შესახებ საზოგადოება სრულად ინფორმირებული იქნება", - აცხადებს სოფლის მეურნეობის სამინისტროს პრესამსახური.