პარტია "საქართველოს გზის" საპატიო თავმჯდომარე სალომე ზურაბიშვილი საპრეზიდენტო კანდიდატად ვერ დარეგისტრირდება.
სააპელაციო სასამართლომ ზურაბიშვილის საპრეზიდენტო კანდიდატად დარეგისტრირების უფლების არ მინიჭების თაობაზე საქალაქო სასამართლოს გადაწყვეტილება ძალაში დატოვა.
თავად ზურაბიშვილი მეორე ინსტანციის მიერ მიღებულ გადაწყვეტილებას სამარცხვინოს უწოდებს და აცხადებს, რომ პრეზიდენტობის კანდიდატად დარეგისტრირებისთვის ბრძოლას განაგრძობს, თუმცა რა ნაბიჯებს გადადგამს, ჯერ-ჯერობით უცნობია.
"ამ დრომდე კანონს ვემორჩილებოდი, რომელიც მეუბნებოდა რა უნდა გამეკეთებინა კანდიდატად რეგისტრაციისთვის და რა უნდა გამეკეთებინა პრეზიდენტის არჩევნებში მონაწილეობის მისაღებად. ამიტომ, სხვა ნაბიჯი არ გადამიდგამს, თუმცა ერთი ნაბიჯი გადავდგი - ეს იყო მისვლა საფრანგეთის საელჩოში და მოქალაქეობის დათმობის თხოვნაზე განაცხადის შეტანა. ეს დაკმაყოფილებული იქნებოდა იმ დღესვე, როცა საქართველოს მოსახლეობა პრეზიდენტად ამირჩევდა. ეს არის მტკიცება, მაგრამ მე არ გამოვდივარ ორმაგი მოქალაქეობიდან და ამ საბუთს საფრანგეთის საელჩოს დავუბრუნებ, იმიტომ, რომ მე ვთვლი, რომ ამ ქვეყანაში ორმაგი მოქალაქეობის მქონე ბევრი ემიგრანტია და არ არის სწორი ეს დღევანდელ საქართველოში უარყოფილი იყოს,"- განაცხადა სალომე ზურაბიშვილმა.
ცნობისთვის, ცენტრალურმა საარჩევნო კომისიამ სალომე ზურაბიშვილს საპრეზიდენტო კანდიდატად დარეგისტრირებაზე უარი 3 სექტემბერს უთხრა, რის მიზეზადაც კონსტიტუციის და საარჩევნო კოდექსის შესაბამის მუხლებთან საკანონმდებლო შეუთავსებლობა დასახელდა, რომლის მიხედვითაც, ორმაგი მოქალაქეობის მქონე პირს საქართველოს პრეიდენტობის უფლება არ აქვს.