საქართველოს პრეზიდენტის ადმინისტრაციის ხელმძღვანელი ანდრო ბარნოვი მთავრობის წევრებს მათდამი დაქვემდებარებული უწყებების მიერ გამოქვეყნებულ ოფიციალურ წერილებში სწორი ტერმინოლოგიი გამოყენებისკენ მოუწოდებს.
როგორც ბარნოვმა დღეს გამართულ საგანგებო ბრიფინგზე განაცხადა, "სახელმწიფოს საკუთრებაში არსებული ფრანგული წარმოების ვერტმფრენების გასხვისებასთან დაკავშირებით არაადექვატური განმარტებები გაკეთდა და ორი დღის განმავლობაში ერთი და იგივე ინფორმაცია სხვადასხვა მინისტრებმა სხვადასხვანაირად გააჟღერეს, რაც თავისთავად მთავრობის მუშაობის არაეფექტიანობის მაჩვენებელია".
"თავისთავად მთავრობის მუშაობის არაეფექტიანობის მაჩვენებელია, როდესაც ორი დღის განმავლობაში ერთი და იგივე ინფორმაციას ერთი მინისტრი უარყოფს, შემდეგ მეორე ადასტურებს. კარგია ის, რომ ერთ საკითხზე მაინც შევთანხმდით. როგორც ჩანს, თავადვე ადასტურებენ ამ ფრანგული წარმოების ვერტმფრენების გაყიდვაზე, რაზეც გუშინ ვსაუბრობდით, მართლაც იგეგმება. პირველ რიგში მინდა ვკითხო ეკონომიკის მინისტრს თუ გაეცნო ქვეყნის უმაღლესი მთავარსარდლის გუშინდელ ბრძანებას და მის ტექსტს?! იმიტომ, რომ იქ გარკვევით წერია, რომ საუბარი არის არა თავდაცვის სამინისტროს ბალანსზე არსებული, არამედ საქართველოს საკუთრებაში არსებული ვერტმფრენების შესახებ. რაც შეეხება იმას, თუ რამდენად შეუძლია სამხედრო ძალების უმაღლეს მთავარსარდალს რომ ასეთი ქონების განკარგვის შესახებ ბრძანება გამოსცეს, მთავრობას განვუმარტავ, რომ პრაქტიკულად ნებისმიერი ვერტმფრენი და კონკრეტულად ეს ვერტმფრენები, "სუპერ პუმები", რაზეცაა საუბარი, არის ორმაგი დანიშნულებისა და ამის დასტურია ისიც, რომ ე.წ. სამოქალაქო დანიშნულების ვერტმფრენები, როგორც თვითონ ამბობენ, არის სწორედ თავდაცვის სამინისტროსთვის გადაცემული განსაკარგავად. პრეზიდენტი არის არა შეიარაღებული ძალების, არამედ სამხედრო ძალების უმაღლესი მთავარსარდალი და მინდა ვთხოვო მთავრობას, რომ სანამ ოფიციალურ განცხადებებს გამოაქვეყნებენ, კარგად დაფიქრდნენ ხოლმე,"- განაცხადა ანდრო ბარნოვმა.
ამასთან, პრეზიდენტის ადმინისტრაციის ხელმძღვანელი ფრანგული წარმოების ვერტმფრენების ფიზიკურ მდგომარეობასთან დაკაშირებით მთავრობის წევრების მიერ გაკეთებულ განცხადებებსაც გამოეხმაურა და აღნიშნა, რომ "ყველაფერი მაღალხარისხიანი საქართველოს მთავრობის გაღიზიანებას იწვევს".
"ასევე, ორი სიტყვა მინდა ვთქვა იმ პროლეტარული აღშფოთების შესახებ, რომელიც მინისტრის განცხადებაში იკითხება, რომ სალონი თურმე სპეციალურად ყოფილა მოწყობილი პრეზიდენტის ბრძანებით. თავისთავად უცნაურია, როდესაც ყველაფერი მაღალხარისხიანი ჩვენი მთავრობის გაღიზიანებას იწვევს. შენობები იქნება ეს, სამხედრო თუ სამოქალაქო ტექნიკა. მინდა მათ ასეთი კითხვა დავუსვა: მაგალითად, რითი დაფრინავს პრემიერი ივანიშვილი?! იმ თვითმფრინავს ხომ არ იყენებს, რომლის გარშემოც არჩევნებამდე მთელი წლის განმავლობაში სრულიად უშვერი ვაკხანალია იყო ატეხილი?! ასევე, სააკაშვილმა "გაბედა" ამ თვითმფრინავის შეძენა,"- დასძინა ბარნოვმა.
