საპარლამენტო უმცირესობა პარლამენტში ეკონომიკურ საკითხებთან დაკავშირებით დებატებს ითხოვს, - ამის შესახებ დღეს ბიუროს სხდომაზე უმცირესობის ერთ-ერთმა ლიდერმა ლევან ბეჟაშვილმა განაცხადა. მისი თქმით, მნიშვნელოვანია ქვეყანაში ეკონომიკურ საკითხებთან დაკავშირებით დებატები პარლამენტში გაიმართოს. ,,ქვეყანაში არსებული ეკონომიკური მდგომარეობიდან და სიტუაციიდან გამომდინარე მნშივნელოვნად მიგვაჩნია უმცირესობას 18-20 სექტემბერს დებატები გავმართოთ ეკონომიკურ საკითხებზე, ამის მოთხოვნის უფლება რეგლამენტით გვაქვს. არსებობს შეკითხვები ეკონომიკურ სფეროში ამიტომ მნიშვნელოვანია მათზე პასუხები გაეცეს",-აცხადებს ლევან ბეჟაშვილი.
ბეჟაშვილის ამ განცხადებას საპარალამენტო უმრავლესობის ერთ ერთი ლიდერი დავით ბერძენიშვილი გამოეხმაურა. ბერძენიშვილის განცხადებით 18-20 სექტემბერს, სასესიო კვირას, პარლამენტში დატვირთული დღეებია, რის გამოც დებატების გამართვა, მომდევნო სასესიო კვირისთვის აჯობებს.
გაიმართება თუ არა მომავალ კვირას დებატები, ამის თაობაზე კანონმდებლები 16 სექტემბრის ბიუროს სხდომაზე იმსჯელებენ.
მასალის გამოყენების პირობები