ფარული ჩანაწერების განადგურების საკითხზე მომუშავე სპეციალური 9 კაციანი კომისიის წევრი, ექსპერტი კახი კახიშვილი ინტიმური ხასიათის ფარული ჩანაწერების განადგურების გადაწყვეტლებას მხარს არ უჭერს.
მისი თქმით, აღნიშნული ჩანაწერების განადგურება არ შეიძლება მანამ, სანამ საქმეზე გამოძიება არ დასრულდება და ყველა ის პირი არ დაისჯება, რომლებმაც მოქალაქეთა პირადი ცხოვრების ამსახველი ჩანაწერები ფარულად გადაიღეს.
"მიმაჩნია, რომ დანაშაულებრივი გზით მოპოვებული მასალის განადგურებამდე უნდა ყოფილიყო იმ დამნაშავე პირების ვინაობა დადგენილი, რომლებმაც სამსახურეობრივი უფლებამოსილების ბოროტად გამოყენებით, გადამეტებით ადგნენ და გაბედეს მოქალაქეების საძინებლებში კამერების დამონტაჟება. ის, რომ ეს მასალები ნადგურდება, ნიშნავს იმას, რომ ის ადამიანები არ დაისჯებიან,"- განაცხადა კახი კახიშვილმა.
საქართველოს შინაგან საქმეთა სამინისტროში არსებულ საცავში აღმოჩენილი მოქალაქეთა პირადი ცხოვრების ამსახველი ინტიმური ხასიათის ფარული ჩანაწერების საერთო ხანგრძლივობა 181 საათი და 30 წუთია და მისი სრულად განადგურება 5 სექტემბერს 15:00 საათზე ე.წ. მოდულის შენობაში მოხდება.
უკვე ცნობილია, რომ ინტიმური ხასიათის ფარული ჩანაწერების განადგურების პროცესს მედიასაშაულებების წარმომადგენლებიც დაესწრებიან.
ამასთან, 5 სექტემბერს, 15:00 საათზე ინტიმური ხასიათის ფარულ ვიდეოჩანაწერებთან ერთად, შსს-ში აღმოჩენილი მსგავსი ტიპის ფოტომასალაც განადგურდება.
