2-4 სექტემბერს, თბილისში, საზღვარგარეთ საქართველოს დიპლომატიური წარმომადგენლობების ხელმძღვანელთა შეხვედრა - ამბასადორიალი გაიმართება.
ამბასადორიალს საქართველოს საგარეო საქმეთა მინისტრი მაია ფანჯიკიძე გახსნის, რომელიც თავის მოხსენებაში დიპლომატიური სამსახურის მიერ გაწეულ საქმიანობას შეაჯამებს, ისაუბრებს საგარეო პოლიტიკის პრიორიტეტებზე და შემდგომი მუშაობის ძირითად მიმართულებებზე.
ამბასადორიალის გახსნას დაესწრება საქართველოს პრემიერ-მინისტრი ბიძინა ივანიშვილი; ამბასადორიალის მსვლელობაში მონაწილეობას მიიღებენ და სიტყვით გამოვლენ საქართველოს აღმასრულებელი და საკანონმდებლო ხელისუფლების წარმომადგენლები. ამბასადორიალის ფარგლებში ელჩები შეხვდებიან საქართველოს პრეზიდენტს.
სამი დღის განმავლობაში ამბასადორიალის მონაწილეები განიხილავენ საქართველოს საგარეო პოლიტიკის აქტუალურ საკითხებს და იმსჯელებენ ქართული დიპლომატიის წინაშე არსებულ გამოწვევებზე. განხილული იქნება შემდეგი თემები: საქართველოს ტერიტორიული მთლიანობის უზრუნველყოფისა და სუვერენიტეტის განმტკიცების ამოცანები; საქართველოში მიმდინარე პოლიტიკური პროცესები; საქართველოს ევროპული და ევროატლანტიკური ინტეგრაცია; საქართველოს ეკონომიკური განვითარება; საქართველოს კულტურული და ჰუმანიტარული საკითხები; ადამიანის უფლებების დაცვის და საქართველოს არასამთავრობო ორგანიზაციებთან თანამშრომლობის საკითხები; ორმხრივი და მრავალმხრივი დიპლომატიური ურთიერთობები; საქართველოს საპრეზიდენტო არჩევნებთან დაკავშირებული საკითხები; ადმინისტრაციული, საორგანიზაციო და საკონსულო საკითხები.
აღსანიშნავია, რომ ამბასადორიალის დაწყებამდე, 31 აგვისტოს და 1 სექტემბერს, მაია ფანჯიკიძე საგარეო საქმეთა სამინისტროში შეხვედრებს გამართავს საზღვარგარეთ საქართველოს დიპლომატიური წარმომადგენლობების ყველა ხელმძღვანელ პირთან.
