"სამწუხაროდ, საქართველოს პრეზიდენტმა დღეს კიდევ ერთხელ შეძლო, დაერღვია ყველა წესი და რიგი ასეთი შეხვედრების,"- ამის შესახებ საქართველოს უმაღლესი საკანონმდებლო ორგანოს თავმჯდომარე დავით უსუფაშვილმა ამერიკის შეერთებული შტატების საზღვაო სამხედრო ხომალდ "BULKELEY"-ზე გამართულ საზეიმო ღონისძიებაზე პრეზიდენტ სააკაშვილის მიერ სიტყვით გამოსვლისას გაკეთებული განცხადებების კომენტირებისას ისაუბრა.
"ოფიციალური გამოსვლების შემდეგ მეც მომიწია გარკვეული მობოდიშება ჩვენი სტუმრებისთვის, ვინაიდან ასეთ ღონისძიებებს თავისი ფორმატი აქვს და თავისი თემატიკა აქვს. სამწუხაროდ, საქართველოს პრეზიდენტი ამ ყველაფერს დიდი ხანია აღარაფრად დაგიდევთ. ამიტომ, მან სრულიად უადგილო თემები წამოწია, მაგრამ ჩვენ ამას მიჩვეული ვართ. უბრალოდ, არ ველოდი, რომ ჩვენი სტუმრების თანდასწრებით ამას გააკეთებდა, მაგრამ მე მგონი უკვე ყველა გაგებით ეკიდება ასეთ მოვლენებს", - განაცხადა დავით უსუფაშვილმა.
ცნობისთვის, საქართველოს პრეზიდენტი მიხეილ სააკაშვილი და პრემიერ-მინისტრი ბიძინა ივანიშვილი ამერიკის შეერთებული შტატების საზღვაო ხომალდ "BULKELEY"-ზე გამართულ ოფიციალური საზეიმო ღონისძიებას დაესწრნენ.
აღნიშნულ ღონისზიებაზე საქართველოს ხელისუფლების უმაღლესი პოლიტიკური თანამდებობის პირებს მასპინძლობას საქართველოში ამერიკის შეერთებული შტატების ელჩი რიჩარდ ნორლანდი და ხომალდ "BULKELEY"-ს კაპიტანი უწევდნენ.
ღონისძიებაზე სიტყვით გამოსვლისას საქართველოს პრეზიდენტმა 2008 წლის რუსეთ-საქართველოს ომის შესახებ ისაუბრა და აღნიშნული ომის დროს დაღუპული სამხედრო მოსამსახურეების გმირობა და სამშობლოს წინაშე გაწეული ღვაწლი გაიხსენა.
მისივე თქმით, "საქართველოს მთვრობა სიმშვიდით ხდება იმას, რომ ოკუპირებული ტერიტორიების მოსაზღვრე ტერიტორიებზე რამდენიმე ადგილზე მავთულხლართები კიდევ გადმოიწია".
"ბატონო ბიძინა, მე იმედი მაქვს, რომ თქვენ არ ხართ შეკრული საქართველოს მტერთან, იმედი მაქვს თქვენ აცნობიერებთ თქვენ პასუხისმგებლობას საქართველოს მომავალზე,"- აღნიშნა მიხეილ სააკაშვილმა.
საზეიმო ღონისძიებას საქართველოს უმაღლესი საკანონმდებლო ორგანოს თავმჯდომარე დავით უსუფაშვილი, თავდაცვის მინისტრი ირაკლი ალასანია, შინაგან საქმეთა მინისტრი ირაკლი ღარიბაშვილი, ენერგეტიკის მინისტრი და ვიცე-პრემიერი კახი კალაძე, საგარეო საქმეთა მინისტრი მაია ფანჯიკიძე და ხელისუფლების სხვა წარმომადგენლებიც დაესწრნენ.
ამერიკული სამხედრო საზღვაო ხომალდი "BULKELEY" საქართველოს ტერიტორიულ წყლებში 10 აგვისტოს შემოვიდა. 2 დღიანი ვიზიტის ფარგლებში დაგეგმილია ფართომასშტაბიანი სამხედრო წვრთნები .