„დაუბეგრავი მინიმუმის თემა არის ერთ-ერთი პრიორიტეტი, მაგრამ ყველაფერი ეს ისევე როგორც სოციალური ხარჯები, ჯანდაცვის ხარჯები დამოკიდებულია იმაზე თუ რამდენად სრულფასოვნად და ოპტიმალურად შესრულდება საბიუჯეტო მაჩვენებლები. დღეს სურათი არის ასეთი: წინა წელთან შედარებით წელს საგადასახადო შემოსავლებთან შედარებით არის კლება. შესაბამისად მოლოდინები იმისა, რომ წლის მეორე ნახევარში შესაძლებელია საბიუჯეტო პროცესი და ფისკალური პროცესი უპრობლემოდ განხორციელდეს დგება კითხვის ქვეშ. ამაზე ერთის მხრივ ნეგატიურად მოქმედებს გარკვეული მაკროეკონომიკური პარამეტრების შემცირება, მშპ და სხვა. მშპ რა არის? მშპ არის ქვეყანაში ერთიანად წლის განმავლობაში წარმოებული ყველა სიკეთე ერთად. თუ წარმოებული პროდუქცია და მომსახურება მცირდება, თუ პირდაპირი უცხოური ინვესტიციების მოცულობა მცირდება და თუ საწარმოებს ბრუნვა უმცირდებათ ეს ხომ პირდაპირ აისახება ამ საწარმოების მიერ ბიუჯეტში გადახდილი გადასახადების მოცულობაზე. ბუნებრივია, ჩნდება კითხვები. ვთხოვთ ხელისუფლებას, რომ ამ პირობებში იქნებ გაგვარკვიოს, რის ხარჯზე აპირებს იმ ვალდებულებების გასტუმრებას, რაც ბიუჯეტშია გაწერილი დაუბეგრავ მინიმუმთან დაკავშირებით.
ხელისუფლებას ამ ყველაფერზე პასუხი არ აქვს და იძახის, რომ წლის მეორე ნახევარში ყველაფერი გამოსწორდება. ირიბად ახსნებს თემას ფონდებთან დაკავშირებით. თუმც ეს ფონდები ერთის მხრივ არის გრძელვადიან პერსპექტივაში და შესაბამისად ფისკალური ეფექტი მიმდინარე წელს, ჩემი გადმოსახედიდან, არ ექნება", - აცხადებს "ჯი-ეიჩ-ენთან" საუბარში კალანდაძე.

მისივე განმარტებით, ხელისუფლება ბიუჯეტის კორექტირებას არ აპირებს, ასეთ ვითარებაში კი საშემოსავლო ნაწილის შევსება გაუჭირდება. ექსპერტი არ გამორიცხავს, რომ შექმნილი რთული ვითარებიდან გამომდინარე მთავრობამ არაპირდაპირი გადასახადები გაზარდოს, რისი პირველი ნიშნებიც უკვე სახეზეა.
„ვალდებულებების გასტუმრება დგება სერიოზული კითხვის ქვეშ. ეს ვალდებულებები კი შეიძლება გასტუმრდეს, მაგრამ რის ხარჯზე? ავიღებთ დამატებით სასესხო ვალდებულებებს უცხოეთის ბაზრებიდან? ავიღებთ სესხებს? გავყიდით რამეს და გასაყიდი კიდე რაიმე გვააქვს? გაისტუმრებს თუ არა ხელისუფლება ვალდებულებებს ეს დამოკიდებულია იმაზე თუ რას მოიმოქმედებს. თუ გადასახადებს გაზრდის და დამატებით ვალდებულებებს აიღებს ბუნებრივია გაისტუმრებს, მაგრამ რის ხარჯზე? „თავისუფლების ქარტია" არ ეხება არაპირდაპირ გადასახადებს და თავისუფლად შეუძლია ქარტიის გვერდის ავლით მოახდინოს გადასახადის ზრდა. პირველი მცდელობა უკვე არის - აქციზის გადასახადის ზრდის სახით. გადასახადს სწორედ იმიტომ ზრდიან, რომ ბიუჯეტში შემოსავლების ზრდაა საჭირო", - აცხადებს კალანდაძე.

შეგახსენებთ, რომ მოქალაქეები, რომელთა წლიური შემოსავალი 6 ათას ლარს არ აღემატება, დაუბეგრავი მინიმუმის შეღავათით ისარგებლებენ. ამ მოქალაქეებს წლის ბოლოს უკან დუბრუნდებათ წლის მანძილზე საშემოსავლო გადასახადის სახით გადახდილი საარსებო მინიმუმის 20 პროცენტი.