პარტიების დაფინანსების ახალ კანონპროექტს საპარლამენტო უმცირესობის წევრი პავლე კუბლაშვილი აფასებს. მისი თქმით, პარტიების დაფინანსების ახალი კანონპროექტის პირობებში „ნაციონალური მოძრაობა" კოალიციაში შემავალ პარტიებთან შედარებით სამჯერ ნაკლებ თანხას მიიღებს. კუბლაშვილის თქმით, კარგი იქნებოდა, რომ პარლამენტის ინტერფრაქციულ ჯგუფს მეტი დრო დაეთმო დამატებითი დეტალების შეთანხმებისათვის.
„როგორი იქნება საბოლოო ფორმულირებები, კიდევ უნდა ვნახოთ. კოალიციაში შემავალი პარტიები 2 მილიონ 100 000 ლარს მიიღებენ. „ნაციონალური მოძრაობა" 600 000 ლარს მიიღებს, მაგრამ ჩვენგან მხარდაჭერილი იქნება ეს კანონი. მთავარია, პარტიებმა შეთანხმებას მიაღწიონ," - ამბობს კუბლაშვილი.
შეგახსენებთ, რომ პოლიტიკური პარტიების სახელმწიფო ბიუჯეტიდან დაფიანსების ახალი წესი საპრეზიდენტო არჩევნებმადე ამოქმედდება. კანონპროექტის მიხედვით, კვალიფიციურ საარჩევნო სუბიექტებს გაუორმაგდებათ საბაზისო დაფინანსება. პარლამენტში მყოფი 7 პარტია, რომელთაც ფრაქციები აქვთ, დამატებით 300 000 ლარს მიიღებს. ხოლო საბაზისო დაფინანსების ნაწილი მიეცემა იმ პოლიტიკურ სუბიექტებს, რომლებმაც ბოლო საპარლამენტო არჩევნებში ბარიერი ვერ გადალახეს.
