ოკუპირებული ტერიტორიებიდან იძლებულთ დაგაადგილებულ პირთა, განსახლებისა და ლტოლვილთა მინისტრი პარალელურად იმ დევნილებსაც შეხვდა, რომლებიც ბინის განაწილების პროცესში ჩაერთვნენ და სპეციალურ ანკეტებს ავსებენ. აღნიშნულ ანკეტებს მიენიჭება ქულები და ბინების განაწილება სწორედ ქულების შესაბამისად მოხდება.
როგორც დევნილები აცხადებენ, წლებია, საკუთარ ჭერს ელოდებიან. „როცა სამინისტრომ გამოაცხადა, რომ რუსთავში ბინები ნაწილდებოდა და სპეციალური განაცხადები უნდა შეგვევსო, არ დავიჯერე. დღეს მოვედი ანკეტის შესავსებად და დაველოდები ბინის განაწილებას. მშენებარე ბინაც დავათვალიერე და ძალიან მომეწონა. ადგილიც კარგია" - აღნიშნა დევნილმა დარიკო ჭელიძემ.
მშენებლობაზე თავად დევნილები არიან დასაქმებულები. „ამ ობიექტზე 2 თვეა ვმუშაობ. დღეში 20 ლარს მიხდიან. ძალიან კარგია, რომ ასეთი შენობები დევნილებისთვის არის განკუთვნილი და ჩვენ, დევნილები, ვმუშაობთ, შემოსავალიც გაგვიჩნდა და მერე ისევ ჩვენ მოგვიწევს ცხოვრება" - აღნიშნა აფხაზეთიდან დევნილმა რევაზ ჭანტურიამ დავით დარახველიძესთან საუბრისას.
მინისტრმა რუსთავში კიდევ ერთი შენობა დაათვალიერა, რომელიც ასევე დევნილებისთვის უნდა გარემონტდეს, თუმცა, იქ არადევნილები არიან შეჭრილები. დავით დარახველიძემ შეჭრილებს სთხოვა დატოვონ თვთნებურად დაკავებულ ობიექტი, რადგანაც სარემონტო სამუშაოები ფერხდება და ისევ დევნილები ზარალდებიან: „ფალიაშვილის ქუჩაზე სარეაბილიტაციო სამუშაოები მიმდინარეობს გრაფიკის მიხედვით და 20 აგვისტოსთვის უნდა დასრულდეს. ასევე, მეორე ობიექტზე მიმდინარეობს მშენებლობა, სადაც ამდენივე ოჯახი განთავსდება. სამწუხაროდ, კიდევ 2 ობიექტი გვაქვს რუსთავში გასარემონტებელი, თუმცა, ის ოკუპირებულია გაურკვეველი წარმომავლობის ადამიანების მიერ, რომლებიც ხელს უშლიან სახელმწიფო პროგრამის განხორციელებას დევნილთა საცხოვრებელი ფართებით უზრუნველყოფასთან დაკავშირებით. მინდა კიდევ ერთხელ მოვუწოდო მათ, რომ დატოვონ უკანონოდ დაკავებული ფართები წინააღმდეგ შემთხვევაში, ხელისუფლებას სხვა აღარაფერი რჩება, თუ არა მათი გამოსახლება, რადგან, მათი ასეთი უკანონობით უფრო მეტი დევნილის უფლებები ირღვევა, რომლებიც ათეულობით წლები ელოდებიან საცხოვრებელ ფართებს".