"თელასი" განაგრძობს სოციალურად დაუცველი მოზარდებისთვის სასწავლო სახელოსნოების მოწყობისა და აღჭურვის პროექტის ფინანსურ მხარდაჭერას, რომელსაც საქართველოს საპატრიარქოს საქველმოქმედო ფონდი `ლაზარე~ ახორციელებს.
კომპანიის მხარდაჭერით შეიქმნა ჯგუფი ლითონისა და ხის დამუშავების ტექნოლოგიების შესასწავლად. ასევე, მოეწყო და სათანადოდ აღიჭურვა სამკერვალო და სამხატვრო სახელოსნოები.
ლითონისა და ხის დამუშავების ტექნოლოგიების შესასწავლად პირველი სახელოსნოები ფონდმა "ლაზარე" 2006 წლის გაზაფხულზე გახსნა. ამ სახელოსნოებში 150-მდე მოზარდი სწავლობს.
წარმატებულ მოზარდთა ჯგუფებისთვის ტარდება ბიზნეს კურსები, რომ ახალგაზრდებმა საქმიანობა დამოუკიდებლად განაგრძონ. ამ კატეგორიის მოზარდების პრობლემებით საზოგადოების დაინტერესების მიზნით, ფონდი რეგულარულად აწყობს მათი ნამუშავრების გამოფენა-გაყიდვებს, ამზადებს სატელევიზიო გადაცემებს, რაც ბავშვებს სპეციალობის უკეთ დაუფლების სტიმულს აძლევს.
გამოფენა-გაყიდვა, რომლის ორგანიზატორი, ისევე როგორც გასულ წელს, კომპანია "თელასია", სამების სკათედრო ტაძართან არსებულ ახალგაზრდულ ცენტრში 15-16 ივლისს ჩატარდება. გამოფენა-გაყიდვაზე წარმოდგენილი იქნება ფერადი ლითონებისგან დამზადებული სამკაულები და ქალის ტანსაცმელი. ბავშთა ნამუშევრების გაყიდვიდან შემოსული თანხა სახელოსნოების განვითარებას მოხმარდება.
კომპანია "თელასი" მომავალშიც გააგრძელებს მსგავსი პროექტების მხარდაჭერას.
***სს „თელასი" ერთ-ერთი მსხვილი კომპანიაა საქართველოში ელექტროენერგიის დისტრიბუციის დარგში, რომელიც ახორციელებს ელექტროენერგიის განაწილებას თბილისში. კომპანია ელექტროენერგიას აწვდის 460 ათასზე მეტ მომხმარებელს. 2003 წლის აგვისტოში სს „თელასი" „ინტერრაო ეეს"-ის შემადგენლობაში შევიდა. „ინტერრაო ეეს"-ის მფლობელობაშია „თელასის" აქციათა 75%, ხოლო 25%-მდე სახელმწიფოს საკუთრებაა.
"ჯგუფი „ინტერრაო ეესი"- დივერსიფიცირებული ენერგეტიკული ჰოლდინგია, რომელიც რუსეთსა და მის საზღვრებს გარეთ ელექტროენერგეტიკის სფეროს მრავალ სეგმენტში მონაწილეობს. კომპანიას რუსეთის ელექტროენერგიის იმპორტ-ექსპორტის დარგში ლიდერის პოზიცია უკავია , მისი წილი აქტიურად იზრდება გენერაციის და რეალიზაციის სეგმენტებში, ასევე ავითარებს ბიზნესის ახალ მიმართულებებს. „ინტერრაო ეეს"-ის სტრატეგია მიმართულია გლობალური ენერგეტიკული კომპანიის შექმნისკენ, რომელიც მსოფლიო ენერგეტიკული ბაზრის ერთერთი გადამწყვეტი მოთამაშე იქნება.
„ინტერრაო ეეს"-ის ჯგუფის შემადგენლობაში შემავალი და მის მმართველობაში მყოფი ელექტროსადგურების დადგმული სიმძლავრე 33.5 გიგავატს შეადგენს.
