„4 ივლისს ევროპის ლიგის პირველ ეტაპზე, საქართველოს ბრინჯაოს პრიზიორმა - "ქუთაისის ტორპედომ", რომლის ახალი შემადგენლობის პრეზენტაცია ვისოლმა 14 ივნისს ქუთაისის ცენტრალურ სტადიონზე გამართა, სლოვაკურ "ჟილინასთან" მარცხი განიცადა. წარუმატებელ თამაშს გულშემატკივართა ემოციური გულისწყრომა მოჰყვა, რასაც კლუბის მენეჯმენტი გაგებით ხვდება. ის ცვლილებები, რომელიც ბოლო პერიოდში „ტორპედო ქუთაისმა" განიცადა, მოიტანს დადებით შედეგებს, მაგრამ, ბუნებრივია, ამას გარკვეული პერიოდი დაჭირდება. კლუბის მენეჯმენტს სწამს, რომ მოთმინებითა და შრომით კლუბი მიაღწევს წარმატებას. რომელსაც ქართველი გულშემატკივარი ასე ელოდება. ჩვენ გვინდა ვთხოვოთ და მოვუწოდოთ გულშემატკივრებს ტრადიციულად, ჩვეული შემართებით გააგრძელონ კლუბის მხარდაჭერა და გავამხნევოთ ჩვენი ფეხბურთელები. ქუთაისის ტორპედოს ახალი შემადგენლობა დაკომპლექტებულია ჩვენი ქვეყნის ყველაზე ნიჭიერი ახალგაზრდა ფეხბურთელებით. კლუბის მენეჯმენტი განაგრძობს ზრუნვას სელექციის გზით გუნდის გაძლიერებისათვის და დარწმუნებული ვართ უახლოეს მომავალში ვიხილავთ იმ თამაშს, რომელიც „ტორპედო ქუთაისს" ეკადრება", - აცხადებს „ტორპედო ქუთაისის" პრეზიდენტი ლევან ფხაკაძე.
„ტორპედო ქუთაისზე" მზრუნველობა ვისოლმა 2010 წლიდან დაიწყო და გუნდის განვითარებისათვის ყოვეწლიურად ოთხი მილიონი ლარის ინვესტიცას ახორციელებს. ამას გარდა, ვისოლ ჯგუფმა ჯამურად უკვე 30 მილიონ ლარზე მეტი გაიღო თბილისსა და რეგიონებში ევროპული სტანდარტების სპორტული ინფრასტრუქტურის შექმნისა და ზოგადად ქართული სპორტის განვითარებისათვის.
