,,იტალიის მთავრობა არ შეიცვლის პოზიციას საქართველოს ტერიტორიული მთლიანობისა და სუვერენიტეტისადმი", _ განაცხადა ,,ჯი-ეიჩ-ენის" შეკითხვის საპასუხოდ საგარეო საქმეთა მინისტრმა მაია ფანჯიკიძემ პიზაროს მუნიციპალიტეტის მოთხოვნის კომენტირებისას.
,,იტალია არის ევროკავშირის წევრი ქვეყანა, ჩვენი პარტნიორი, იგი მხარს უჭერს საქართველოს ტერიტორიულ მთლიანობასა და სუვერენიტეტს, იტალია მხარს უჭერს გაეროში საქართველოს რეზოლუციას. ასე რომ, იტალიის საგარეო საქმეთა სამინისტროს მიმართონ რითაც უნდათ, ეს არ ნიშნავს იმას, რომ იტალიის მთავრობა ერთი მილიმეტრითაც შეცვლის თავის დამოკიდებულებას საქართველოს მიმართ", _განაცხადა მაია ფანჯიკიძემ.
შეგახსენებთ, რომ იტალიის ქალაქ პიზაროს მუნიციპალიტეტმა იტალიის საგარეო საქმეთა სამინისტროში წერილი გააგზავნა, რუსეთის მიერ ოკუპირებული საქართველოს ორი რეგიონის აფხაზეთისა და სამაჩაბლოს ე.წ. დამოუკიდებლობის ე.წ. აღიარების თხოვნით. ინფორმაციას ამის შესახებ აფხაზური მედია ავრცელებს.
როგორც ირკვევა, ოკუპირებული აფხაზეთის ე.წ. საგარეო საქმეთა მინისტრის ვიაჩესლავ ჩიირკბას იტალიაში ვიზიტის დროს „რამდენიმე მნიშვნელობანი შეხვედრა გაიმართა რომის საქმიანი წრეების წარმომადგენლებთან და საზოგადოებრივ-პოლიტიკურ მოღვაწეებთან. მინისტრის ვიზიტი ფართოდ გაშუქდა იტალიის მედიით", _ იუწყება აფხაზეთის ე.წ. საგარეო საქმეთა სამინისტრო.
მათივე ინფორმაციით, იტალიის ქალაქ პიზაროში ჩირიკბამ პრესკონფერენცია ჩაატარა, რომელზეც მუნიციპალიტეტის წარმომადგენლებს „აფხაზეთის სახელმწიფოებრიობის ისტორია გააცნო და თანამედროვე პოლიტიკურ სამართლებრივ ახალი რეალობებსაც შეეხო".
„აღნიშნული შეხვედრის დასრულების შემდეგ პიზაროს მუნიციპალიტეტმა იტალიის საგარეო საქმეთა სამინისტროს აფხაზეთისა და სამხრეთ ოსეთის დამოუკიდებლობის აღიარებისკენ მოუწოდა. თხოვნის ტექსტს მუნციპალიტეტის მთავარმა მრჩევლებმა მოასწერეს ხელი", _ იუწყება აფხაზური მხარე.