თბილისის საკრებულოს დეპუტატი კოკი იონათამიშვილი საქართველოს პრეზიდენტ მიხეილ სააკაშვილს ვალების გასტუმრებაში დახმარებას სთხოვდა და შესაბამისი წერილითაც მიმართა.
წერილში, რომელიც „ჯი-ეიჩ-ენს" პრეზიდენტის ადმინისტრაციამ მიაწოდა, იონათამიშვილი ქვეყნის პირველ პირს პირადი ბიზნესიდან წილის გასხვისებაში დახმარებას სთხოვს.
ვერასდროს წარმოვიდგენდი, რომ მოგმართავდით ასეთ კერძო და პრივატულ თემაზე... ვერასდროს ვიფიქრებდი, რომ ასე გავკადნიერდებოდი, მაგრამ ცხოვრებში ყველაფერი ხდება. საოცრად გაფასებთ, მაგრამ ამ წერილში ამაზე საუბარი არ გამომივა. მინდა გითხრათ, რომ არ ვთვლი, რომ რაიმე ისეთი მაქვს გაკეთებული, რომ ასე მომემართა თქვენთვის... მაგრამ რაც არის, არის... წერაც კი მიმძიმეს და პირადად ხომ ამის თქმას საერთოდ ვერ მოვახერხებდი. მოკლედ, პრობლემა მაქვს, ისეთი როგორც ბევრს, არაფერი ორიგინალური, ვალებმა რომ იტყვიან, დამახრჩო. მოკლედ რომ გითხრათ, მსურს გთხოვოთ დახმარება... ისეთი პრობლემური გარემო მაქვს, რომ გავკადნიერდი და მოგმართეთ. თუ თქვენ შეგიძლიათ მიშუამდგომლოთ რომელიმე ბიზნესმენთან, მე მაქვს წილი ერთ "ბიზნესში", რომელსაც რიგი ობიექტური და სუბიექტური ფაქტორებისა ვერ ვყიდი და თუ ვინმე თქვენი შუამდგომლობის ხარჯზე დამეხმარებოდა, ჩემთვის ეს... არც კი ვიცი რა სიტყვა შევარჩიო, უპირობო გამოსავალს და გადარჩენას ნიშნავს. "ეს ბიზნესი" ცუდი არ არის, მაგრამ დღეს მხოლოდ თქვენი შუამდგომლობის ხარჯზე თუ დაინტერესდება ვინმე... თუ რა თქმა უნდა ამ თავხედობას შემინდობთ და დამეხმარებით, არც კი ვიცი, რა სიტყვები შევარჩიო, ეს ჩემი გადარჩენა იქნება. არ მინდა სიტყვებით დაგტვირთოთ, ისედაც ძალიან ტავხედურად ვიქცევი... რაღაცეებში უბრალოდ სასტიკად არ გამიმართლა... გიგიმ ნაწილობრივ იცის ეს პრობლემები და რამდენიმეჯერ მაგრად მომეხმარა კიდეც, რის გამოც მისი მადლიერი ვარ უზომოდ, მაგრამ საბოლოოდ მოგვარება არ გამოვიდა...
ჩემს პრობლემასთან გამკლავების სულ ოდნავი საშუალება რომ დამრჩენოდა არ შეგაწუხებდით. თუმცა ჩემზე მეტი პრობლემები რომ აქვს უამრავ ადამიანს ესეც გასაგებია. თუ თქვენს ჩემს თხოვნას ყურად მიიღებთ, ქვემოთ დავწერ რა ბიზნესი მაქვს და რა თხოვნა კონკრეტულად. თუ არადა არაუშავს. მეტის თქმის უფლება ნამდვილად არ მაქვს. ძალიან მაგარი და გამორჩეული პრეზიდენტი გვყავხართ და ხალხი ამას ხვალ და ზეგ კიდევ უფრო მეტი სიმძაფრით შეიგრძნობს, ვიდრე ეს ოდესმე იყო.
(ფორმალური და ოფიციალური წერილი გამომივიდა, მაგრამ ეხლა სხვაგვარად არც კი ვცდილობ, რომ გამომივიდეს. ალბათ კიდევ ბევრი რამის თქმა მინდა ამაზეც, ზოგადადაც, მაგრამ ახლა, ის დრო არაა...). ვალში არ დაგრჩებით. ისიც მესმის, რომ იმდენად რთულ რამეს გთხოვთ, რომ თქვენი სურვილის შემთხვევაშიც კი შეიძლება არ გამოვიდეს დახმარება. ბოდიშს გიხდით, რომ ასე დაგტვირთეთ. ამ წერილს ვერც ერთ შემთხვევაში ვერ ვაპატიებ ცემს თავს, ვიცი.
მე მაქვს წილი ფირმა "საბურთალო 2007"-ში, 2 %. ამ ფირმას აქვს საკუთარი ქონება, შენობა, რომელშიც განთავსებულია ტექნიკის ჰიპერმარკეტი "გალაქსი", პეკინის 46-ში. "გალაქსი" ქირაობს ფართს ჩვენგან, აქვს 15 წლიანი იჯარა, ყოველთვიურად ვიღებ 1000 დოლარზე მეტს ჩემს წილად. შენობის ფართია თითქმის 5000ი კვადრატული მეტრი, სარდაფის ჩათვლით. სხვა მეწილეებმა ახლა წილი ვერ იყიდეს. წილის გაყიდვა, ორივე პროცენტის დათმობა ჯამში მსურს 100 000 დოლარად", - ნათქვამია იონათამიშვილის მიერ მიხეილ სააკაშვილისადმი გაგზავნილ წერილში.