"თელასში" ვეტერან-ენერგეტიკოსთა საიუბილეო-საზეიმო შეხვედრა გაიმართა. საქართველოს ენერგოსექტორში 30, 40 და 50 წლის მუშაობის გამოცდილების მქონე ვეტერანებს დღესასწაული „თელასის", ენერგეტიკის აკადემიის და ვეტერან ენერგეტიკოსთა კავშირის წარმომადგენლებმა მიულოცეს.
თხუთმეტივე იუბილარს, რომელთაგან ოთხი "თელასის" ყოფილი და მოქმედი თანამშრომელია, ფასიანი საჩუქრები გადაეცა. აგრეთვე მათთვის გაიმართა ფოლკლორული ანსამბლის კონცერტი და ბანკეტი. ვეტერან ენერგეტიკოსთა კავშირის მიერ ორგანიზებული ღონისძიება `თელასის" ფინანსური მხარდაჭერით ჩატარდა.
"მინდა მადლობა გადაგიხადოთ იმ უდიდესი წვლილისთვის, რომელიც თქვენ საქართველოს ენერგეტიკის განვითარებაში შეიტანეთ. ჩვენი ამოცანაა გავაგრძელოთ თქვენი ტრადიციები და ყველაფერი გავაკეთოთ დარგის შემდგომი განვითარებისთვეს. გისურვებთ ჯანმრთელობას და კეთილდღეობას "- განაცხადა სს "თელასის" გენერალურმა დირექტორმა სერგეი კობცევმა.
საქართველოს ვეტერან ენერგეტიკოსთა კავშირისთვის სოციალური მხარდაჭერის პროგრამის განხორციელება სს "თელასმა" 2010 წლის გაზაფხულიდან დაიწყო. ღვაწლმოსილი ენერგეტიკოსების თანადგომის შესახებ საქართველოს ენერგეტიკის სამინისტროს ინიციატივას კომპანია „თელასი" ენერგეტიკულ კომპანიებს შორის პირველი გამოეხმაურა. „თელასის" მიერ გამოყოფილი თანხები სოციალურად შეჭირვებული ვეტერანების ფინანსურ თანადგომას მოხმარდება.
***ვეტერან ენერგეტიკოსთა კავშირი 2000 წელს ჩამოყალიბდა და საქართველოს ელექტრონერგეტიკის, გაზისა და ნავთობსამრეწველო სექტორში მრავალი წლის მანძილზე მომუშავე 250 გამოჩენილ ენერგეტიკოსს აერთიანებს. კავშირის მოღვაწეობის ძირითად სფეროს ქველმოქმედება წარმოადგენს, რაც ვეტერანების მატერიალურ დახმარებაში, სამედიცინო და მედიკამენტებით უზრუნველყოფაში, ცნობილი და დამსახურებული ენერგეტიკოსების შესახებ სტატიების მომზადებასა და საიუბილეო თარიღების ორგანიზებაში გამოიხატება
