სოფლის მეურნეობის მინისტრი შალვა ფიფია გამოკითხულთა უმეტესობის მიერ ახალი მთავრობის მთავარ მიღწევად "სოფლის მეურნეობის ვაუჩერის" პროგრამის დასახელებას მიესალმება და მიიჩნევს, რომ "საერთაშორისო რესპუბლიკური ინსტიტუტის" (IRI) კვლევის შედეგებმა პროექტის წარმატებულობა დაადასტურა.
"სასოფლო-სამეურნეო ბარათის დარიგების პროექტი ძალიან მასშტაბური და უპრეცედენტო იყო. პრემიერ-მინისტრის ინიციატივით, ქვეყნის მასშტაბით 700 ათასზე მეტმა ოჯახმა მიიღო სასოფლო-სამეურნეო დახმარება. კვლევის შედეგები ნიშნავს, რომ პროექტი იყო წარმატებული, მან გაამართლა და ადამიანებმა დაინახეს პროექტის რეალური შედეგი", - განუცხადა "ინტერპრესნიუსს" შალვა ფიფიამ. მისივე ინფორმაციით, მოსახლეობისთვის მსგავსი ტიპის ხელშეწყობა მომავალშიც იგეგმება.
"საერთაშორისო რესპუბლიკური ინსტიტუტის" (IRI) კვლევის მიხედვით, რესპონდენტთა უმეტესობა ახალი მთავრობის მთავარ მიღწევად სოფლის მეურნეობის ვაუჩერების დარიგებას ასახელებს. შეკითხვაზე "რომლებია ახალი მთავრობის ძირითადი მოღწევები?" - "სოფლის მეურნეობის ვაუჩერების დარიგება" პირველი რიგის წარმატებულ საკითხად გამოკითხულთა 14 %-მა, მეორე რიგის მიღწევად კი 20 %-მა დაასახელა.
შემდეგ ადგილზე მოდის გადასახადების ოდნავი შემცირება, რომელიც, რესპონდენტთა 9 %-ის აზრით, ახალი მთავრობის მიერ პირველი რიგის მიღწევას წარმოადგენს, ხოლო 14 %-ის შეფასებით, მეორე რიგში წარმატებული საკითხია.
რაც შეეხება დანარჩენ საკითხებთან მიმართებაში პროცენტულ მაჩვენებლებს, ასე გადანაწილდა: სოფლის მეურნეობა - 8-12 %, სამართალი - 4-7 %, უფასო სასკოლო სახელმძღვანელოები - 3-6 %, პენსიის ოდნავი მომატება _ 3-5 %, საყოველთაო ამნისტია - 2-4 % და საყოველთაო დაზღვევა ასევე 2-4 %.