„ევროსტატის" მიერ დაფინანსებული საერთაშორისო მისიის მიერ მომზადებული „საქსტატის" საქმიანობის შეფასების დოკუმენტი, ჩემი აზრით, საკმაოდ არაკვალიფიციურია. ეტყობა ამ ხალხს საერთოდ არ შეუსწავლია ქართული კანონმდებლობა და არც ის, თუ რა გადახდა თავს საქართველოს სტატისტიკას და არც ის თუ როგორია საქართველოს კონსტიტუცია და რა მუხლები ამოქმედდება საპრეზიდენტო არჩევნების შემდეგ. ისინი, რომ შესაბამის კანონმდებლობას გაცნობოდნენ იმ შეცდომებს არ დაუშვებდნენ, რაც იქ წერია. სტატისტიკის ეროვნული სამსახურის შეყვანა მთავრობის შემადგენლობაში, ეს არის არა უბრალოდ შეცდომა, არამედ ეს არის დანაშაული. ეს დანაშაული თავის დროზე ჩაიდინა „ნაციონალურმა მოძრაობამ", და „ევროსტატი" რომ იგივეს გაკეთებას ითხოვს, ეს უბრალოდ გაუგებარია"- აცხადებს ლადო პაპავა.

პაპავა საერთაშორისო მისიის არც იმ რეკომენდაციას ეთანხმება, რომლის მიხედვითაც „საქსტატი" პარლამენტის წინაშე უნდა იყოს ანგარიშვალდებული.

„რაც შეეხება იმას, რომ თურმე „საქსტატი" ანგარიშვალდებული უნდა იყოს პარლამენტის წინაშე, არც ეს მოდელი მიმაჩნია გამართლებულად. განსაკუთრებით იმ საკონსტიტუციო ცვლილებების შემდეგ, რომელიც 2013 წლის ბოლოს, საპრეზიდენტო არჩევნების შემდეგ ამოქმედდება. საქმე იმაშია, რომ პრეზიდენტს უკვე ჩამოცილებული აქვს აღმასრულებელი ხელისუფლების გაძღოლის ფუნქცია, ის არის გარკვეული პოლიტიკური არბიტრის როლში და, ამავდროულად, მას ეხება შექმნილი კრიზისიდან კრიზისის განმუხტვის ფუნქცია. ამ თვალსაზრისით თუ კი ვინმე წაიკითხავს საქართველოს კონსტიტუციაში მალე რა მოდელი გველის მიხვდება, რომ ყველაზე ლოგიკური სტატისტიკის ეროვნული სამსახურის არსებობა არის პრეზიდენტის დაქვემდებარებაში. იმიტომ რომ პრეზიდენტი ნაკლებად პოლიტიკური დატვირთვის მქონე პიროვნებაა, მას არ აქვს აღმასრულებელი ხელისუფლების ფუნქცია და ყველაზე მეტად პრეზიდენტი ხდება ქვეყანაში არბიტრის ფუნქციის მატარებელი. სწორედ არბიტრს სჭირდება ყველაზე მეტად, რომ იცოდეს თუ რა ხდება ქვეყნის ეკონომიკაში. ამიტომ, ლოგიკურად გამოდის, რომ საქართველოს ახალი კონსტიტუციის საფუძველზე, ყველაზე შედეგიანი, ყველაზე გამართლებული და ყველაზე გამჭვირვალე იქნება სიტუაცია, როდესაც სტატისტიკის ეროვნული სამსახური იქნება უშუალოდ პრეზიდენტის დაქვემდებარებაში. ამავდროულად, არც ეს დაქვემდებარება ვერ უშველის ჩვენს სტატისტიკას, სადაც ბევრი მაღალპროფესიონალი მუშაობს თუ არ გაიზრდება ბიუჯეტიდან დაფინანსება და თუ სტატისტიკის ეროვნულ სამსახურს არ გადმოიყვანენ თბილისში და არ მისცემენ ნორმალურ ოფისს. ამ პრობლემების გადაჭრა კი, სამწუხაროდ, ჭიანურდება. ამიტომ გამოსავალია ის, რომ გადაწყვეტილება სტატისტიკის სამსახურთან მიმართებაში უნდა მივიღოთ, ახლად ასამოქმედებელი კონსტიტუციიდან გამომდინარე და მეორე - ბიუჯეტში შესაბამისად ჩაიდოს დაფინანსება, რომ სტატისტიკური სამუშაოები ჩატარდეს მაღალ დონეზე და სტატისტიკოსობა საქართველოში პრესტიჟული პროფესია გახდეს"- აღნიშნა „ჯი-ეიჩ-ენთან" საუბრისას ლადო პაპავამ.

შეგახსენებთ, რომ რამდენიმე დღის უკან „საქსტატის" აღმასრულებელმა დირექტორმა ზაზა ჭელიძემ სააგენტო „ჯი-ეიჩ-ენთან" საუბრისას განაცხადა, რომ საერთაშორისო მისია საქართველოს სტატისტიკის ეროვნული სამსახურის რეფორმირების რეკომენდაციას გასცემს, რომლის მიხედვითაც „საქსტატის" დამოუკიდებლობა მნიშვნელოვანია, თუმც ის რომელიმე სამინისტროს დაქვემდებარებაში უნდა ფუნქციონირებდეს. მისივე განმარტებით, საერთაშორისო მისიის ანგარიში და რეკომენდაციები „საქსტატის" მიერ დამუშავდება. სამომავლოდ გასატარებელი რეფორმების გეგმები შედგება და ამის შემდგომ ის განსახილველად და დასამტკიცებლად საქართველოს მთავრობას გადაეგზავნება.