,,ურთიერთობის ნორმალიზება რუსეთთან საქართველოს ეროვნული უსაფრთხოებისთვის უმნიშვნელოვანესია", -განაცხადა ბათუმში მიმდინარე თავდაცვისა და უსაფრთხოების კონფერენციაზე სიტყვით გამოსვლისას საქართველოს საგარეო საქმეთა მინისტრმა მაია ფანჯიკიძემ.
მისივე განმარტებით, ქართული მხარის მხრიდან გადადგმული პოზიტიური ნაბიჯების მიუხედავად რუსული მხარის პასუხი კვლავ დესტრუქციული და პროვოკაციულია.
"მშვიდობა და სტაბილურობა საქართველოში რჩება გამოწვევად ე.წ. გაყინული კონფლიქტების გამო. ურთიერთობის ნორმალიზება რუსეთთან საქართველოს ეროვნული უსაფრთხოებისთვის უმნიშვნელოვანესია და ჩვენ ვერ ვხედავთ აღნიშნული მიმართულებით დიალოგის გარდა სხვა ალტერნატივას. გასულ თვეებში საქართველომ დაადასტურა, თუ რამდენად გონივრულ მიდგომას იყენებს რუსეთთან ურთიერთობების დალაგებისთვის და ჩვენ ამას გავაგრძელებთ, თუმცა მიუხედავად ჩვენი კონსტრუქციული ნაბიჯებისა - ვიზის გაუქმება, რუსეთის მხარდაჭერა ვაჭრობის მსოფლიო ორგანიზაციაში გაწევრიანების საკითხზე, პრემიერ-მინისტრის მიერ რუსეთთან ურთიერთობებში სპეციალური წარმომადგენლის დანიშვნა, ოლიმპიადაში მონაწილეობა და სხვა, რუსული პასუხი კვლავ დესტრუქციული და პროვოკაციულია. რუსეთი აგრძელებს საკუთარ აგრესიულ პოლიტიკას", - განაცხადა მაია ფანჯიკიძემ.
