აჭარის მთავრობამ „ქამრები შემოიჭირა". როგორც დღეს აჭარის მთავრობის მეთაურმა არჩილ ხაბაძემ განაცხადა, ხელისუფლება შეეცადა საკუთარი ხარჯის შემცირების ფონზე, სოციალური პროექტები დაეფინანსებინა.
„ჩვენ მუშაობის მთავარ პრინციპად „ქამრების შემოჭერის" მეთოდი ავირჩიეთ. ის მემკვიდრეობა რაც ვნახეთ და რაც დაგვხვდა სოციალური მიმართულებით, გადავწყვიტეთ, რომ აპარატისა და წარმომადგენლობითი ხარჯები შეგვემცირებინა და ეს თანხები სოციალური მიმართულებით მიგვემართა. ბოლო 5 თვის განმავლობაში, მხოლოდ წარმომადგენლობითი ხარჯების სახით, მთავრობის აპარატში დაახლოებით 550 ათას ლარამდე ეკონომია გაკეთდა. დანარჩენ სამინისტროებში კი შესაბამისად დაახლოებით 100 ათას ლარამდე. იანვარ-მაისში 80 %-ით ნაკლები დაიხარჯა მთავრობის აპარატიდან ვიდრე 2012 წლის იმავე პერიოდში. დაახლოებით 600 ათასამდე იყო გათვლილი და 107 ათასი ლარი გვაქვს მხოლოდ დახარჯული. ხარჯები შემცირებულია დაახლოებით 2-ჯერ სამინისტროების შემთხვევაშიც. ეს თანხები ძირითადად იხარჯებოდა სტუმრების და ზოგადად იმ მიმართულებით რაც წარმომადგენლობით ხარჯშია გათვალისწინებული"- განაცხადა აჭარის მთავრობის მეთაურმა არჩილ ხაბაძემ.
