პირადი ცხოვრების ამსახველი ვიდეომასალა კვირას, 23 ივნისს განადგურდება. ამის შესახებ ჟურნალისტებთან სახალხო დამცველმა უჩა ნანუაშვილმა განაცხადა, რომელიც შინაგან საქმეთა სამინისტროში პირადი ცხოვრების ამსახველი ვიდეოჩანაწერების განადგურების მიზნით შექმნილი კომისიის სხდომას ესწრებოდა.
,,პირადი ცხოვრების ამსახველი მასალები იქნება განადგურებული, რაც შეეხება სხვა მასალებს კომისია ამაზე დამატებით მსჯელობს, გამოძიება ამ საქმეზე მიმდინარეობს და უკვე შემდეგ კვირაში გადაწყდება სხვა ვიდეომასალების ბედი", -განაცხადა ნანუაშვილმა.
მისივე განცხადებით, პირადი ცხოვრების ამსახველ მასალებში რომელიც კომისიის სხდომაზე იქნა წარმოდგენილი მოხვედრილები არიან პოლიტიკოსები, მედიის წარმომადგენლები, სასულიერო პირები და საზოგადო მოღვაწეები.
