უახლოეს წლებში საქართველოში თამბაქოს აქციზი გაძვირდება. აღნიშნულს ითვალისწინებს თამბაქოს კონტროლის სტრატეგია, რომელიც საქართველოს მთავრობას შემუშავებული აქვს. როგორც ჟურნალისტებთან დაავადებათა კონტროლისა და საზოგადოებრივი ჯანდაცვის ეროვნული ცენტრის ხელმძღვანელმა ამირან გამყრელიძემ განაცხადა სტრატეგიის გათვალისწინებით შვიდ კანონში გარკვეული ცვლილებები უნდა შევიდეს.
მისი განმარტებით, 31 მაისი მსოფლიოში აღინიშნება დღე თამბაქოს გარეშე.
,,როგორც ცნობილია საქართველოში პრემიერის ხელშეწყობით 15 მარტს შეიქმნა სამთავრობო კომისია თამბაქოს კონტროლის გამკაცრების ღონისძიებებთან დაკავშირებით. ასევე შექმნილია ჯგუფი ჯანდაცვის სამინისტროში დავით სერგეენკოს მეთაურობით. რამდენიმე სხდომა უკვე გაიმართა, მომზადებულია პაკეტი დოკუმენტების და შვიდ კანონში შესატანი ცვლილებების პაკეტი. სტრატეგია გულისხმობს თამბაქოს კონტროლის გაძლიერებას ძირითადად ორი მიმართულებით", _განაცხადა გამყრელიძემ.
მისივე განმარტებით, სტრატეგია ითვალისწინებს საინფორმაციო კამპანიასა და საზოგადოებაში კონსენსუსის მიღწევას.
,,ხელი უნდა შევუწყოთ ადამიანებს, რომელებიც არიან თამბაქოზე დამოკიდებულნი, რათა მათ შეძლონ თამბაქოს მიტოვება", -განაცხადა გამყრელიძემ.
მისივე თქმით, საჯარო დაწესებულებაში თამბაქოს აკრძალვა და აქციზის ფასის ზრდა, რაც თავის მხრივ 4-5 წლის განმავლობაში მოხდება, საბოლოოდ პროდუქტის გაძვირებას გამოიწვევს.
